Bakı-Şamaxı şosesində işıq dirəklərinin işləksiz olması magistral yolda hərəkət edən sürücülərin və piyadaların həyatını risk altına atır.

Patrul.az-a daxil olan videogörüntüdə də görünür ki, Müşfiqabad qəsəbəsinə gedən yolda işıq dirəklərinin olduğu halda, işləksiz vəziyyətdə olması həm piyadaların, həm də sürücülərin hərəkətini çətinləşdirir.

Bu isə qaranlıqda hərəkət edən avtomobillərin qəza törətmə və ya piyada zolağından keçən şəxsləri vurma riskini artırır.

Problemin ən kritik tərəfi isə müasir piyada keçidi işarəsi olan dirəyin üstündə belə sarı işığın yanmamasıdır. Məlum olduğu kimi, bu işıq sürücülərə piyada keçidinin olmasından xəbər verir ki, bu zaman onlar sürət həddini azalda bilsinlər.

Məsələ ilə bağlı şikayət edən vətəndaş bildirir ki, Hökməli istiqamətindən Müşfiqabad qəsəbəsinə gedən yolların qaranlıq olması tez-tez piyadaların vurulması halları ilə nəticələnir.

Görüntülərdə də aydın görünür ki, vətəndaşlardan biri həmin piyada zolağından keçərkən ona tərəf hərəkət edən avtomobillərdən ehtiyat edir.

Qeyd edək ki, sözügedən yolda avtobus dayanacaqları da mövcuddur.