Türkiyənin ana müxalifət partiyası olan Cümhuriyyət Xalq Partiyası (CHP) daxilində gərginlik daha da artıb. Məhkəmənin partiyanın 2023-cü ildə keçirilmiş qurultayını etibarsız saymasından sonra başlayan böhran yeni mərhələyə keçib. Keçmiş sədr Kemal Kılıçdaroğlu ilə partiya rəhbərliyində təmsil olunan bəzi şəxslər arasında açıq qarşıdurma yaranıb.

Referans Media xəbər verir ki, Ankara Apellyasiya Məhkəməsinin qərarı ilə CHP-nin 4-5 noyabr 2023-cü il tarixində keçirilmiş 38-ci Qurultayı etibarsız hesab olunub. Qərardan sonra partiya rəhbərliyində ciddi dəyişikliklər baş verib və Kemal Kılıçdaroğlunun yenidən CHP sədri kimi fəaliyyətə başladığı bildirilib.

Qərarın ardından CHP Baş Qərargahı önündə gərgin anlar yaşanıb. Partiya daxilində yaranan qarşıdurma zamanı polis müdaxiləsi olduğu, bibər qazı və plastik güllələrdən istifadə edildiyi iddia olunub. Hadisələrdən sonra tərəflər arasında siyasi gərginlik daha da dərinləşib.

Müzakirələrin mərkəzində isə CHP qrup sədr müavini Ali Mahir Başarır dayanır. Başarırın Kemal Kılıçdaroğlu barədə səsləndirdiyi sərt ifadələrin partiya rəhbərliyində ciddi narazılıq yaratdığı bildirilir.

Türkiyə mediasının məlumatına görə, Kemal Kılıçdaroğlu yaxın ətrafına “Sadəcə onu bağışlamaram” mesajını verib. Bunun ardından Ali Mahir Başarır haqqında partiyadan qəti xaric edilmə tələbi ilə intizam prosesinə başlanacağı iddia olunur.

Məlumata əsasən, CHP-də yaxın günlərdə keçiriləcək toplantılarda həm intizam məsələləri, həm də partiya daxilindəki son proseslər geniş şəkildə müzakirə ediləcək. Partiya daxilində müxtəlif qruplar arasında münasibətlərin daha da gərginləşdiyi qeyd olunur.

Eyni zamanda, aralarında Ekrem İmamoğlunun da olduğu bəzi CHP-li bələdiyyə rəhbərlərinin fəaliyyətləri ilə bağlı partiya rəhbərliyinə izahat vermələrinin istənilə biləcəyi bildirilir. Türkiyə siyasətində CHP ətrafında baş verən son hadisələr ölkə gündəminin əsas mövzularından birinə çevrilib.