"Apple" şirkəti "iOS 26.1"in yeni "beta" versiyasında zəngli saat ekranının dizaynını yeniləyib. Məqsəd - istifadəçilərin səhvən zəngli saatı söndürməsinin qarşısını almaqdır.

Oxu.Az bu barədə "9to5Mac"ə istinadla xəbər verir.

Bildirilir ki, zəngi dayandırmaq üçün artıq böyük "Stop" düyməsini basmaq yox, ekranda "Slide to stop" jestini etmək lazım olacaq. Bu dəyişiklik səhv toxunuş nəticəsində siqnalın dayanma ehtimalını azaldır.

Dizayn dəyişikliyi, "iOS 26"nın sentyabrda təqdim edilən versiyasında böyük "söndür" və "təxirə sal" düymələrinin istifadəçilər arasında narazılıq yaratması səbəbindən həyata keçirilib. Yeni mexanizm həmçinin taymerlərə də tətbiq olunur.

"iOS 26.1"in bu ayın sonunadək bütün istifadəçilərə təqdim ediləcəyi gözlənilir.