“Google” ABŞ-ın Arkanzas ştatında inşa edilən iri günəş enerjisi layihəsinin ilk mərhələdə istehsal edəcəyi elektrik enerjisinin hamısını satın almaq barədə razılıq əldə edib. Şirkət bu addımla qalıq yanacaqlardan yaranan karbon emissiyalarını kompensasiya etməyi hədəfləyir.

Qaynarinfo xəbər verir ki, razılaşmaya əsasən, “Google” 2029-cu ildə fəaliyyətə başlaması planlaşdırılan “Steel River Energy Center” kompleksinin ilkin istehsal gücünün tamamını alacaq. Layihənin bu mərhələsi 1,6 giqavat günəş enerjisi istehsalı və 2 giqavat gücündə batareya enerji saxlama sistemi ilə təmin olunacaq. Bu həcmdə enerji təxminən 315 min ev təsərrüfatının elektrik tələbatını ödəyə bilər.

Şirkət istehsal olunan elektrik enerjisinə görə sabit ödəniş edəcək. Bununla belə, həmin enerjini birbaşa öz obyektlərinə yönəltməyəcək.

“Google” elektrik enerjisini əvvəlki kimi kömür, təbii qaz, nüvə və bərpa olunan enerji mənbələrinin daxil olduğu mövcud elektrik şəbəkəsindən almağa davam edəcək. “Steel River Energy Center”də istehsal ediləcək enerji də həmin ümumi şəbəkəyə ötürüləcək.

Layihə tam başa çatdıqdan sonra “Steel River Energy Center” 2,45 giqavat günəş enerjisi istehsal gücünə və 2,9 giqavat-saat (GWh) tutumunda batareya enerji saxlama sisteminə malik olacaq.

Üç mərhələdən ibarət layihənin ilk iki hissəsinin maliyyələşdirilməsi üçün 3,5 milyard ABŞ dolları ayrılıb. Layihədə ABŞ-da istehsal olunan polad və günəş panellərinə üstünlük verilib.

Məlumata görə, “Google”un elektrik enerjisi istehlakı ötən il 37 faiz artıb. Bu artım şirkətin elektrik şəbəkəsindən qaynaqlanan karbon emissiyalarının da eyni səviyyədə yüksəlməsinə səbəb olub.

Oxşar vəziyyət “Meta” və “Amazon” kimi digər texnologiya şirkətlərində də müşahidə olunur. Süni intellekt sistemlərini dəstəkləyən məlumat mərkəzlərinin sürətlə genişlənməsi elektrik enerjisinə tələbatı əhəmiyyətli dərəcədə artırıb. Hazırda bu tələbatın böyük hissəsi hələ də qalıq yanacaqla işləyən elektrik stansiyaları hesabına ödənilir.

Alimlər ötən ay Avropada müşahidə olunan rekord isti hava dalğalarının iqlim dəyişikliyi olmadan bu miqyasda baş verməsinin demək olar ki, mümkün olmadığını bildiriblər.

Artan enerji tələbatı səbəbindən texnologiya şirkətləri son dövrlərdə iri bərpa olunan enerji layihələrinə sərmayə qoyur və ya bu obyektlərin istehsal etdiyi elektrik enerjisini uzunmüddətli müqavilələrlə satın alırlar.

“Meta” Texas ştatında yerləşən, gücü 200 meqavat olan günəş elektrik stansiyasının bütün enerji istehsalını satın alıb. “Amazon” isə Oreqon ştatında həyata keçirilən 1,2 giqavat gücündə “Sunstone” günəş enerjisi və batareya layihəsini almaq üçün razılıq əldə edib.

Mütəxəssislər bildirirlər ki, bu cür müqavilələr şirkətlərin karbon emissiyalarını kompensasiya etmək strategiyasının mühüm hissəsi hesab olunsa da, bəzi ekspertlər onların iqlimə real təsirinin hələ də mübahisəli olduğunu vurğulayırlar.

Paşa Məmmədli