Son illərin ən acınacaqlı və ürəkağrıdan problemlərindən biri əlillik dərəcələrinin kütləvi şəkildə ləğv edilməsidir. Əmək və Əhalinin Sosial Müdafiəsi Nazirliyinin nəzdində olan Dövlət Tibbi-Sosial Ekspertiza və Reabilitasiya Agentliyi (DTSERA) dövlət büdcəsini “qorumaq canfəşanlığı” ilə hətta müddətsiz təyin olunmuş əlillik statuslarını belə ləğv edir. Bununla bağlı Azərbaycanın inzibati məhkəmələrində qalaq-qalaq vətəndaş şikayəti toplanıb.

Çox vaxt məhkəmə orqanları vətəndaşın haqlı tələbini müdafiə etdikdə DTSERA “qiyam” bayrağı qaldırır; nəinki vətəndaşa, hətta məhkəmə orqanına karşı kassasiya şikayəti vermək üçün “qollarını çırmalayır”. Təbii ki, vətəndaşların əlilliyi ləğv edildiyi andan onların sosial təminatları da dayandırılır. Bizim “dostumuz” olan agentlik isə vətəndaşdan əsirgədiyi müavinəti cavabdeh qismində məhkəmələrə rüsum ödəyərək xərcləyir və ciddi-cəhdlə vətəndaşın haqqını tapdamağa çalışır. Hətta agentlik özündən o qədər müstəbeh bir mövqeyə çatıb ki, Ali Məhkəmənin qərarlarını icra etmir, onlara hörmətsizlik göstərir.

Nəhayət ki, Azərbaycan Respublikası Ali Məhkəməsinin İnzibati Kollegiyası 19 may tarixli, 15(1-8)-69/2026 saylı müdrik bir qərar qəbul etdi. Qərarın məzmunu ondan ibarətdir ki, agentlik vətəndaşın əlilliyini ləğv etdikdən sonra vətəndaş məhkəməyə müraciət edərsə, yekun qərar əldə olunana qədər onun sosial təminatı dayandırılmayacaq. Agentlik prosesi nə qədər uzatsa, vətəndaş müavinətini bir o qədər almaqda davam edəcək. Nəticədə məhkəmə iddiaçının və ya cavabdehin xeyrinə qərar qəbul etdikdən sonra mübahisəyə nöqtə qoyulacaq, müavinət ya davam etdiriləcək, ya da dayandırılacaq.

İllərdir fiziki və əqli qüsurlu insanları süni şəkildə məhkəmə qapılarında süründürməyə vadar edən agentliyin qarşısına nəhayət ki, Ali Məhkəmə tərəfindən sədd çəkildi. Biz də “Faktum.az” saytı adından Ali Məhkəmənin İnzibati Kollegiyasına qəbul etdiyi bu ədalətli və ali qərara görə təşəkkür edirik.