2026-cı il futbol üzrə dünya çempionatının B qrupunun 3-cü turunda İsveçrə və Kanada milliləri üz-üzə gəliblər.

Oxu.Az xəbər verir ki, qarşılaşma Kanadanın Vankuver şəhərində yerləşən "Bi-Si Pleys" stadionunda keçirilib. Oyunu braziliyalı baş hakim Ramon Abatti idarə edib.

Matç İsveçrə millisinin 2:1 hesablı qələbəsi ilə başa çatıb.

İsveçrə yığmasının ilk qolunu 46-cı dəqiqədə Ruben Varqas vurub. O, cinahdan cərimə meydançasına ötürülən topu dəqiq zərbə ilə qapıdan keçirib. 57-ci dəqiqədə yarımmüdafiəçi Yohan Manzambi komandasının ikinci qoluna imza atıb.

Kanada millisi isə 76-cı dəqiqədə fərqi azaltmağa nail olub. Komandanın hücumçusu Promis Devid bir qolla yadda qalıb.

Bu qələbədən sonra xallarının sayını yeddiyə çatdıran İsveçrə millisi dünya çempionatının pley-off mərhələsinə vəsiqə qazanıb. Həmçinin Kanada yığması da aktivindəki dörd xalla pley-off mərhələsinə adlaya bilib.

B qrupunun 3-cü turunun digər oyununda isə Bosniya və Herseqovina ilə Qətər görüşüb.

Qarşılaşma ABŞ-nin Sietl şəhərində yerləşən "Lümen Fild" stadionunda keçirilib. Matçı venesuelalı baş hakim Xesus Valensuela idarə edib.

Görüş Bosniya və Herseqovina millisinin 3:1 hesablı qələbəsi ilə yekunlaşıb.

Oyunda hesabı 29-cu dəqiqədə bosniyalı yarımmüdafiəçi Kerim-Sem Alaybegoviç açıb. 34-cü dəqiqədə Qətər millisinin müdafiəçisi Sultan Əl-Brake topu öz qapısından keçirərək hesab arasındakı fərqi artırıb.

Qətər yığması 42-ci dəqiqədə fərqi azaltmağa nail olub. Komandanın hücumçusu Həsən Əl-Haydos Bosniya və Herseqovina millisinin qapısına yol tapıb.

Matçda son nöqtəni isə 81-ci dəqiqədə bosniyalı yarımmüdafiəçi Ermin Mahmiç qoyub və komandasının üçüncü qolunu vurub.

Beləliklə, üç oyunda cəmi bir xal toplayan Qətər millisi B qrupunda sonuncu - dördüncü yeri tutaraq turnirlə vidalaşıb. Bosniya və Herseqovina yığması dörd xala malik olmasına baxmayaraq, şəxsi göstəricilərdə eyni xallı Kanadadan geri qalaraq üçüncü pillədə qərarlaşıb.