Birinci Kamil getdi. Bir səhər onu otağında, sinəsini tutaraq ölmüş halda tapdılar. Təcili yardım "kəskin infarkt" dedi. Bir həftə sonra isə Rüstəm idman zalında ürəktutmasından yerə sərildi. Ayan hər ikisinin cənazəsini "böyük bir kədərlə" yola saldı. İndi o, Londonun mərkəzində, sirrini bilən bütün şahidləri yox etmiş, milyonların üzərində oturan tək, azad və "təmiz" bir qadın idi.
Hicab artıq Londonda lazım deyildi. Namazlar da elə o təm-təraqlı Həcc fotosundan sonra bitmişdi. Ayan indi Avropa elitasına daxil olmaq üçün yeni bir maska hazırlayırdı. O, bahalı idman zallarından birinə – Fitnesə yazıldı. Bədənini yenidən formaya saldı. Və hədəfini tapdı: Hans.
Hans 40 yaşlarında, almaniyalı zəngin bir memar idi. Birinci evliliyindən bir uşağı var idi. O, Avropanın o nizamlı, amma bir az cansıxıcı həyatından bezmiş, fərqli, şərq ekzotikası və "faciəli hekayəsi" olan qadınlara qarşı zaafı olan tipik bir Qərbli idi.
Ayan Hansın qarşısına əzilmiş, lakin qürurlu qadın obrazı ilə çıxdı. O, Hansın uşağını elə saxta bir ana məhəbbəti ilə qucaqladı, ona elə isti davrandı ki, alman kişi bu "fədakar" qadına anında vuruldu.
Bir axşam şərab kənarında Ayan Hansa öz "həqiqi" keçmişini danışdı. Gözlərindən axan o ustalıqla hazırlanmış yaşlarla, Azərbaycanı necə tərk etməyə məcbur olduğunu izah etdi:
– "Mənim ərim... o, Qarabağ müharibəsində, mənim qollarım arasında şəhid oldu." – Ayan bunu deyəndə səsi elə qəhərləndi ki, Hansın gözləri doldu. – "Mən iki yetim uşaqla tək qaldım. Dövlətdəki o korrupsionerlər ərimin haqqını yedilər. Mən haqsızlığa dözə bilmədim, onlara qarşı çıxdım. Müxalifətə, AXCP-yə qoşuldum. Məni təqib etdilər, öldürmək istədilər. Mən sadəcə övladlarımı xilas etmək üçün bu qürbətə sığındım."
O bilirdi ki, Avropalıları ən çox iki şeylə manipulyasiya etmək olur: Siyasi təqib və müharibə qurbanı olmaq. Ayanın 2000 manata rüşvətlə, sadəcə sığınacaq almaq üçün satın aldığı o saxta AXCP üzvlük vəsiqəsi indi onun Londondakı qəhrəmanlıq dastanı idi. Minlərlə gəncin qanı bahasına alınan Qarabağ qələbəsi və şəhidlik zirvəsi isə onun üçün sadəcə avropalı bir kişini yatağa salmaq və onun sərvətinə şərik olmaq üçün istifadə edilən ucuz bir ssenari idi.
Hans ona inandı. Hans onun keçmişindəki o 15 kişini, o ifrazat dolu yataqları, qətlə yetirilmiş o iki cangüdəni, şantajla məhv edilən Raminləri görmürdü. O, qarşısında müqəddəs bir qadın, əsl "demokratiya qurbanı" görürdü.
Ayan Hansla evləndi. Onların toy fotoları London jurnallarında "Sevginin gücü: Şərqdən gələn qaçqın qadının nağılı" başlığı altında yayımlandı. Otağının pəncərəsindən Londonun işıqlarına baxan Ayan qədəhindəki şampanı yudumlayaraq gülümsədi. O, bu dünyadakı bütün dəyərləri – namusu, dini, şəhidliyi, siyasəti, analığı – fahişəliyə çevirib satmış və hər dəfə qalib gəlmişdi.
Cəmiyyət o qədər axmaqdır ki, iblisə həmişə birinci sırada yer verir.
Avropa cəmiyyəti qəribə bir xəstəliyə mübtəladır: onlar uzaq ölkələrdəki faciələrə acıyaraq, uzaqdan pul göndərməklə öz daxili günahlarını yuduqlarını düşünürlər. Ayan bu kollektiv psixoloji zəifliyi dərhal kəşf etmişdi. Hansın sərvəti ona sadəcə bir tramplin idi; əsl güc, kütlələrin cibinə qanuni və müqəddəs yollarla girməkdə idi.
Bir neçə il içində Ayan, Hansın əlaqələrindən və pullarından istifadə edərək Londonun mərkəzində böyük bir "Haqq Müdafiəçisi və Qlobal Yardım Fondu" qurdu. Təsis sənədlərində məqsəd Şərqdəki müharibə qurbanlarına, diktaturalardan qaçanlara və kimsəsiz uşaqlara yardım kimi qeyd olunmuşdu. Ayanın vaxtilə Azərbaycanda neft maqnatının bağ evində iki cangüdəndən peyda olan o iki oğlu artıq böyümüş, Avropa təhsili almış, lakin genlərindəki o iyrənc riyakarlığı analarından tam mənimsəmişdilər. Ayan hər iki oğlunu bu beynəlxalq fondun vitse-prezidenti təyin etdi. Ailə biznesi, "mərhəmət" üzərində çiçəklənirdi.
Ardi var..
Dr. Benjamin Karimov
TEREF