İran Hörmüz boğazından keçən gəmilər üçün yeni dəniz sığortası sistemi yaratmağa hazırlaşır.

Valyuta.az xəbər verir ki, “Təhlükəsiz Hörmüz” adlanacaq layihə çərçivəsində zərər görən gəmi və tankerlərə kompensasiyanın "Bitcoin" vasitəsilə ödənilməsi də nəzərdə tutulur.

Valyuta.az xəbər verir ki, İran bununla beynəlxalq ödəniş sistemlərindən, xüsusilə də SWIFT mexanizmindən asılılığı azaltmağı hədəfləyir. Layihə çərçivəsində həyata keçiriləcək ödənişlərin Qərb maliyyə infrastrukturundan kənarda aparılması planlaşdırılır.

Məlumata görə, İran tərəfi yeni sistem vasitəsilə illik 10 milyard dollardan çox gəlir əldə etməyi gözləyir. Bununla yanaşı, layihənin beynəlxalq səviyyədə qəbul olunmaması riski də var. Belə ki, “Təhlükəsiz Hörmüz” sistemi ilə sığortalanan bəzi gəmi və tankerların Qərb ölkələrinin limanlarına girişində problemlərlə üzləşə biləcəyi bildirilir.

Hazırda qlobal dəniz sığortası bazarı əsasən Qərb ölkələrinin, xüsusilə də London mərkəzli şirkətlərin nəzarətindədir və ödənişlər əsasən dollar əsaslı maliyyə sistemi üzərindən həyata keçirilir.