Ukraynanın orta mənzilli zərbə dronları Rusiya ordusunun əvvəllər təhlükəsiz hesab etdiyi təchizat marşrutlarını hədəfə almağa başlayıb.

Moderator.az xəbər verir ki, bu barədə "Business Insider" nəşri yazıb.

Orta mənzilli dronlar yeni mərhələ açır

Nəşr yazır ki, bu pilotsuz aparatların tətbiqi müharibədə yeni mərhələ yaradaraq cəbhədən yüzlərlə kilometr uzaqda yerləşən hərbi obyektlərə zərbələr endirməyə imkan verir.

413-cü RAID pilotsuz sistemlər alayının analitiki, keçmiş dron operatoru Dmitri Jluktenkonun sözlərinə görə, dronlara "Starlink" terminalı quraşdırılaraq internet bağlantısı təmin edilir, daha sonra onlar əsas magistrallara yönləndirilir və "sərbəst ov" rejimində hərbi hədəfləri axtarmağa başlayır. Onun sözlərinə görə, bu üsul düşmənin arxa cəbhəsində 100 kilometrədək dərinlikdə "xaos" yaradır.

Rusiya logistikası yeni təhlükə ilə üz-üzədir

Nəşr qeyd edir ki, yaxın mənzilli FPV dronları cəbhə xəttindəki canlı qüvvə və texnikanı vurduğu, uzaqmənzilli pilotsuz aparatların isə neft obyektləri, aviabazalar və digər strateji hədəflərə zərbələr endirdiyi halda, orta mənzilli dronlar bu iki istiqamət arasındakı boşluğu doldurur.

Onlar təxminən 20-300 kilometr məsafədə yerləşən anbarları, nəqliyyat vasitələrini, logistika qovşaqlarını və komanda məntəqələrini hədəfə alaraq ön cəbhənin təminatını çətinləşdirir. Jluktenkonun sözlərinə görə, Rusiyanın bu "orta zona"da güclü müdafiə sistemi yoxdur.

Qərb analitikləri də hesab edir ki, Ukraynanın davamlı pilotsuz aparat hücumları artıq Rusiya hava hücumundan müdafiə sistemini ciddi şəkildə yükləyib və komandanlığı hansı istiqamətləri prioritet qaydada qorumaq dilemması ilə üz-üzə qoyub.

Təzyiq daha da artır

Analitikin fikrincə, Rusiya çoxlu sayda dron-tutucu yerləşdirsə belə, bu qədər geniş ərazinin müdafiəsi böyük resurs tələb edəcək. O bildirib ki, nəticədə Ukrayna üçün üstünlük yaranır, çünki təhlükəli zona getdikcə genişlənir.

Ukrayna rəsmiləri bildirir ki, yeni orta mənzilli zərbə dronları əvvəllər təhlükəsiz hesab edilən arxa cəbhə rayonlarını da hücum üçün əlçatan edib. Bundan əlavə, Ukrayna Silahlı Qüvvələri artıq FireFly adlı yeni hədəfləndirmə modulu ilə təchiz edilmiş ağır zərbə dronlarından istifadə edir.

"Foreign Policy" isə yazır ki, pilotsuz aparatlar artıq müharibənin gedişinə ciddi təsir göstərsə də, təkcə onların kütləvi istifadəsi işğal olunmuş ərazilərin geri qaytarılması üçün kifayət etməyə bilər.