Tabeliyində çalışanlarla çətin söhbətlərdən qaçan və bunu onların rahatlığını düşünməklə əsaslandıran rəhbərlər əslində onlara “ayı xidməti” göstərirlər. “Apple” şirkətinin həmtəsisçisi Stiv Cobs bir dəfə bildirib ki, yaxşı rəhbər əməkdaşların inkişaf etməsinə şərait yaratmalı, onların hər istəyinə güzəştə getməməlidir.

Bu barədə “Inc” nəşri yazıb.

Qeyd olunur ki, çətin söhbətlərdən qaçan rəhbərlər insanları məlumatsız vəziyyətdə qoyurlar. Bundan əlavə, bacarıqlı əməkdaşlar özlərini təkmilləşdirmək imkanlarını itirirlər.

Cobs 2008-ci ildə “Fortune” jurnalına müsahibəsində bu məsələyə toxunub. O, “Apple” şirkətinin baş direktoru kimi vəzifələrindən danışıb və tabeliyində çalışanlarla çətin söhbətlərdən niyə qaçmamaq lazım olduğunu izah edib.

“Mənim vəzifəm insanlara güzəştə getmək deyil. Mənim vəzifəm onları daha yaxşı etməkdir”, deyə Cobs bildirib.

“Apple” şirkətinin həmtəsisçisi öz işini şirkətin müxtəlif bölmələrini bir araya gətirmək, maneələri aradan qaldırmaq, ən vacib layihələr üçün resursları təmin etmək və istedadlı insanları özlərini təkmilləşdirməyə təşviq etmək kimi təsvir edib.

O qeyd edib ki, lider əməkdaşlardan yüksək nəticələr tələb edərkən onların bu nəticələrə nail olmaq üçün ehtiyac duyduğu məlumatı, səlahiyyəti, vaxtı və ya alətləri onlardan əsirgəyə bilməz.

Nəşr əlavə edib ki, əməkdaşlarla vacib söhbətlər zamanı konstruktiv geribildirim vacibdir. Lakin bu geribildirim vaxtında və konkret olmalıdır. Söhbətin sonunda əməkdaşın incimiş qüruru deyil, gələcək üçün fəaliyyət planı olmalıdır.