Türkiyədə Millətçi Hərəkat Partiyasının (MHP) sədri Dövlət Baxçalı ölkədəki siyasi partiyalar və seçim sisteminin yenidən tənzimlənməsinin vacibliyini bəyan edib. MHP lideri partiya sədrinin müavini İsmayıl Özdemirə daxili siyasi gündəmlə bağlı verdiyi açıqlamada mövcud Prezident hökumət sisteminin strukturu və işləmə mexanizminə toxunub.

Türkiyənin 16 aprel 2017-ci il referendumunda qəbul edilən konstitusiya dəyişikliyi ilə Parlament sistemindən Prezident hökumət sisteminə keçdiyini xatırladan Baxçalı, qarşıdakı dövrdə islahatların zəruri olduğunu bildirib:"Qarşıdakı prosesdə sistemin ruhuna uyğun, siyasi sabitliyi və demokratik inkişafı əsas götürən bir anlayışla siyasi partiyalar və seçim sisteminin də yenidən tənzimlənməsi gərəkməkdədir".

MHP sədri müxalifətin daxilində baş verən proseslərə, xüsusilə də CHP ətrafında yaşanan hüquqi və siyasi mübahisələrə münasibət bildirib.

CHP-nin parçalanmasını arzu etmədiklərini vurğulayan Baxçalı, müxalifət daxilindəki daxili çəkişmələrin fəsadlarına diqqət çəkib: "Biz Cümhuriyyət Xalq Partiyasındakı ayrışma və bölünmə cəhdlərinə hər zaman təmkinlə yanaşılmasını tövsiyə etdik, birliyin pozulmamasını istədik. Lakin gəlinən nöqtədə Özgür bəy və dostları `Yeni Parti`ni qurdular. Ədliyyə qeydlərinə görə, siyasi partiya sayını bir vahid artıraraq 190-cı partiyanı təsis etdilər. CHP-nin bölünməsini təqdir etməsək də, özlərinə və partiyalarına uğurlar diləyirik".

Baxçalı əlavə edib ki, siyasi arenada etik qaydalara və milli maraqlara xidmət edən hər bir siyasi qüvvə qiymətlidir. O, CHP-də uzun müddətdir davam edən daxili münaqişələrin və iddia edilən nöqsanların son tapmasının Türk siyasətində təmizlənməyə töhfə verəcəyinə ümid etdiyini qeyd edib.