ABŞ, Böyük Britaniya, Kanada, Avstraliya və Yeni Zelandiyanın daxil olduğu "Beş göz" (Five Eyes) alyansının xüsusi xidmət orqanları uzun müddətdən sonra ilk dəfə birgə xəbərdarlıqla çıxış ediblər.

Oxu.Az "The Guardian" nəşrinə istinadən xəbər verir ki, yaxın bir neçə ay ərzində süni intellektin hökumətlərə və korporasiyalara qarşı dağıdıcı kiberhücumlar həyata keçirə biləcəyi proqnozlaşdırılır. Alyans dünya liderlərini təcili tədbirlər görməyə çağırıb, çünki bu istiqamətdə hərəkətə keçmək üçün vaxt məhduddur.

Bəyanat ABŞ Administrasiyasının xarici vətəndaşlar tərəfindən "Anthropic" şirkətinin "Fable" qabaqcıl modelinin istifadəsinə qoyduğu qadağadan sonra səslənib. Alyans izah edib ki, süni intellekt gələcəkdə müdafiəni gücləndirməyə kömək etsə də, artıq indidən kibertəhdidlərin mürəkkəbliyini dəfələrlə artırıb. Proqnozlara görə, yeni modellər bütün gözləntiləri aşacaq və kiberməkanda güclər balansını illərlə deyil, cəmi bir neçə ay ərzində kökündən dəyişdirəcək.

Mütəxəssislər hesab edirlər ki, generativ modellərin sürətli inkişafı hakerlər üçün giriş maneələrini azaldır və hücumların həyata keçirilməsini sürətləndirir. Bununla əlaqədar olaraq, agentliklər israr edirlər ki, kiberriskləri artıq sırf texniki problem kimi qiymətləndirmək olmaz; bu, biznesin davamlılığı məsələsidir və buna birbaşa ali rəhbərlik məsuliyyət daşıyır.

Sənəddə konkret texnoloji detallar açıqlanmasa da, bütün diqqət həssas nöqtələri və sistem boşluqlarını müəyyən edə bilən "Anthropic" şirkətinin "Fable 5" modelinə yönəlib.