İtaliyanın Siciliya adasında yerləşən Etna vulkanı son 15 il ərzində keçmiş dövrlərə nisbətən daha yüksək aktivlik nümayiş etdirir.

Bu barədə İtaliya Vulkanologiya Assosiasiyasının rəhbəri Marko Vikkaro "RIA Novosti"yə açıqlamasında bildirib.

Mütəxəssisin sözlərinə görə, son zamanlar zirvə kraterləri zonasında püskürmə halları əhəmiyyətli dərəcədə tezləşib. Professor bu vəziyyəti maqmanın dərin təbəqələrdən vulkanın zirvəsinə doğru hərəkətinin asanlaşması, həmçinin aralıq və səth qatlarında yerləşən rezervuarlarda heç bir ləngimə olmadan birbaşa yuxarı qalxması ilə əlaqələndirib.

Vikkaro xatırladıb ki, 2025-ci ilin sonu - 2026-cı ilin əvvəlində baş verən iki püskürmə hadisəsinin ardınca Etna bir neçə aylıq nisbi sükut dövrünə qədəm qoyub. Buna baxmayaraq, 2026-cı ilin iyunundan etibarən zirvə kraterlərinin fəaliyyəti yenidən aktivləşməyə doğru gedib. İlkin proseslər yüngül kül və qaynar vulkanik kütlə püskürən Voracine kraterində nəzərə çarpıb. Alimin məlumatına əsasən, iyunun 26-dan başlayaraq aktivlik qeyri-sabit olsa da, özünü daha kəskin şəkildə büruzə verib.

Qeyd edək ki, iyulun 5-i səhər saatlarında Voracine kraterindən başlayan vulkanik kül püskürmələri bir saat ərzində daha da intensivləşib. Nəticədə Etna zirvəsinin üstündə 1.5 kilometrə qədər ucalan kül buludu formalaşıb. Vulkanın yaxınlığında fəaliyyət göstərən Kataniya beynəlxalq hava limanı isə yalnız iki gün sonra öz işini bərpa edə bilib.