“Ryanair”in maliyyə direktoru Nil Sorahan xəbərdarlıq edib ki, aviasiya yanacağının kəskin bahalaşması səbəbindən daha bir neçə aviaşirkət “Spirit Airlines” kimi fəaliyyətini dayandıra bilər.

Bu barədə “Business Insider” yazır.

CNB-yə müsahibəsində Nil Sorahan bildirib ki, ən böyük risk müharibədən əvvəl də maliyyə problemləri olan daşıyıcılara aiddir: “Düşünürəm ki, bu qış biz artıq zəif vəziyyətdə olan bəzi aviaşirkətlərin sağ qala bilmədiyini görəcəyik”.

Müharibənin başlanmasından sonra “Brent” markalı neftin qiyməti 50%-dən çox artaraq bir barel üçün 110 dollardan yuxarı qalxıb. Aviasiya yanacağının qiyməti isə 200 dollara yaxınlaşıb, daha sonra 163 dollar civarına düşüb. Yanacaq aviaşirkətlər üçün əməkhaqqından sonra ikinci ən böyük xərclərdən biridir.

Ən böyük iflaslardan biri “Spirit Airlines” olub. Şirkət əvvəlki ildən maliyyə restrukturizasiyasından keçirdi və 2026-cı ilin mayında uçuşlarını tam dayandırdı. Əsas səbəblərdən biri kimi yanacağın kəskin bahalaşması göstərilir.

Şirkət qiymət risklərini hedcləmə (hedging) siyasəti ilə azaltmağı bacarıb. “Ryanair” yanacağın təxminən 80%-ni 67 dollar/barel sabit qiymətlə alıb. Bunun sayəsində şirkət hazırda uçuşları azaltmağı və ya yay cədvəlini dəyişməyi planlaşdırmır.

Sorahan bildirib ki, əvvəllər Hörmüz boğazı ətrafındakı risklər narahatlıq yaratsa da, indi təchizat daha sabit görünür. O həmçinin qeyd edib ki, Avropa artıq Yaxın Şərq neftindən daha az asılıdır və daha çox ABŞ, Venesuela və Braziliyadan idxal edir.

Bununla belə, “Ryanair” ən pis ssenarilərə qarşı planların olduğunu da təsdiqləyib. “Bəli, bizdə "Armaqeddon" planları var. Amma bunun baş verəcəyini düşünmürəm”, deyə şirkət nümayəndəsi bildirib.

Hazırda şirkət yay və qış uçuş cədvəlinin tam icrasını planlaşdırır.

“Ryanair” 2026 maliyyə ilində 208 milyon sərnişin daşıyaraq Avropanın ən böyük aviaşirkəti statusunu qoruyub və 2,26 milyard avro xalis mənfəət əldə edib.

Şirkət bildirir ki, yay mövsümündə ciddi yanacaq çatışmazlığı gözlənilmir, lakin sonrakı dövrdə biletlərin bahalaşması mümkündür.