Rusiyada iqtisadi çətinliklər və mobil internetdə tez-tez baş verən kəsintilər fonunda vətəndaşlar getdikcə daha çox nağd puldan istifadəyə qayıdırlar.

The iPaper nəşri Rusiya Mərkəzi Bankının son statistikası və Qərb ekspertlərinin qiymətləndirmələrinə istinadən yazır ki, bu tendensiya bank sisteminə və ümumilikdə dövlət institutlarına etimadın zəiflədiyini göstərir.

Nəşrin məlumatına görə, 2026-cı ilin əvvəlindən etibarən Rusiya Mərkəzi Bankı dövriyyəyə təxminən 14,8 milyard funt sterlinq ekvivalentində nağd pul buraxıb. Bu, COVID-19 pandemiyası dövrü istisna olmaqla, eyni dövr üzrə indiyədək qeydə alınmış ən yüksək göstəricidir.

Məqalədə bildirilir ki, bu artım ölkədə iqtisadi vəziyyətə inamsızlığın gücləndiyini göstərir və uzun müddətdir müharibənin nəticələrini əhali üçün mümkün qədər hiss olunmaz saxlamağa çalışan Kremlin qarşısında yeni problemlər yaradır.

Nəşr qeyd edir ki, Ukrayna Rusiya ərazisinə, xüsusilə də neft emalı zavodlarına pilotsuz uçuş aparatları ilə hücumları xeyli intensivləşdirib. Buna cavab olaraq Rusiya hakimiyyəti dronların naviqasiyasını çətinləşdirmək məqsədilə mütəmadi olaraq mobil interneti məhdudlaşdırır. Nəticədə bir çox vətəndaş rəqəmsal ödəniş xidmətlərindən istifadə edə bilmir və nağd hesablaşmalara üstünlük verməyə məcbur qalır.

Məqalədə qeyd olunan digər amil vergi siyasətindəki dəyişikliklərdir. Bildirilir ki, yanvar ayından etibarən Kreml əlavə dəyər vergisinin (ƏDV) dərəcəsini 20 faizdən 22 faizə qaldırıb, eyni zamanda kiçik və orta sahibkarlığın bu vergini ödəməli olduğu dövriyyə həddini aşağı salıb. Buna görə də bəzi sahibkarlar vergi yükünü azaltmaq və gəlirlərini gizlətmək məqsədilə müştəriləri nağd ödəniş etməyə təşviq edirlər.

Böyük Britaniyanın “Chatham House” analitik mərkəzinin Rusiya və Avrasiya proqramının əməkdaşı Kir Caylz hesab edir ki, nağd pula qayıdış daha geniş etimad böhranının əlaməti ola bilər.

“Bunun iqtisadiyyata və onun fəaliyyətini təmin edən sistemlərə ümumi etimad böhranının bir hissəsi olduğunu düşünmək istərdim”, deyə o bildirib.

The iPaper həmçinin xatırladır ki, Rusiya iqtisadiyyatı artıq ciddi təzyiq altındadır. Rusiya İqtisadi İnkişaf Nazirliyi neft gəlirlərinin azalması, yüksək inflyasiya və böyük hərbi xərclər səbəbindən 2026-cı il üzrə ÜDM artımı proqnozunu aşağı salıb. Bunun fonunda bəzi regionlarda yanacaq qıtlığı və yanacaq satışına tətbiq edilən məhdudiyyətlər Ukraynanın zərbələrinin yaratdığı psixoloji təsiri daha da gücləndirir.

Bununla belə, Kir Kaylz hesab edir ki, iqtisadi təzyiq hələlik Vladimir Putini siyasətini dəyişməyə vadar etmir.

Ekspertin sözlərinə görə, Rusiya prezidenti müharibənin bu şəkildə davam etməsinin iqtisadiyyata uzunmüddətli zərər vuracağı barədə bankirlər və iqtisadçıların xəbərdarlıqlarını artıq açıq şəkildə rədd edib.

Bu səbəbdən, Kremlin müharibəni dayandırmaq istiqamətində real addımlar atmağa hazır olduğuna dair əlamətlər görünmür, baxmayaraq ki, Rusiya daxilində iqtisadi problemlər artmaqda davam edir./poliqon.info