ABŞ Silahlı Qüvvələrinin Birləşmiş Qərargah Rəisləri Komitəsinin sədri Den Keyn İranın Hörmüz boğazını blokadaya almaq imkanlarını minimuma endirmək məqsədilə həyata keçirilən dəniz əməliyyatının ilkin nəticələrini açıqlayıb.

Moderator.az xəbər verir ki, generalın sözlərinə görə, amerikalı hərbçilər hazırda əsas diqqəti İranın mina döşəyən gəmilərinin və mina quraşdırılması üçün yenidən təchiz edilmiş sürətli katerlərinin sıradan çıxarılmasına yönəldiblər. Bu strateji zərbələr nəticəsində artıq İranın 44 belə hərbi gəmisi və kateri darmadağın edilib.

Keyn vurğulayıb ki, mina döşəyən hədəflərin aşkarlanması və məhv edilməsində xüsusi olaraq A-10 hücum təyyarələri daxil olmaqla geniş aviasiya qüvvələrindən istifadə olunur. Bu addım ABŞ-ın Hörmüz boğazını beynəlxalq gəmiçilik üçün yenidən təhlükəsiz hala gətirmək və İranın "enerji şantajı"na son qoymaq qətiyyətini bir daha nümayiş etdirir.

Ekspertlər hesab edirlər ki, mina döşəyən donanmanın bu dərəcədə böyük itki verməsi Tehranın boğazı uzunmüddətli blokadada saxlamaq planlarını faktiki olaraq iflasa uğradır.