Afrikada terror təhlükələrinin neytrallaşdırılması üçün yaradılmış müxtəlif ölkələrin çoxmillətli hərbi kontingenti Çad gölü regionunda "Boko Haram" qruplaşmasının azı 50 terrorçusunu məhv edib.

"Report" TASS-a istinadən xəbər verir ki, bu barədə Nigeriya ordusundakı mənbələrə istinadən "Maghreb Arabe Presse" informasiya agentliyi bildirib.

Bildirilir ki, Kamerun, Niger və Nigeriya qoşunlarının birgə əməliyyatı zamanı onlarla terrorçu öldürülüb. "Hava və quru qüvvələrindən ibarət ordu bölmələri Çad gölü hövzəsində döyüşlər nəticəsində 50 terrorçunu məhv ediblər", - deyə kontingentin rəsmi nümayəndəsi Timoti Antiqa bildirib.

Əməliyyatın gedişatında "Boko Haram" döyüşçülərinə aid texnikanın bir hissəsi ələ keçirilib, bir hissəsi isə məhv edilib.

Daha əvvəl Nigeriyada "Boko Haram" terrorçuları hərbçilərə hücum edib.