Avtomobildə təhlükəsizlik kəmərini bağlamaq həyatımızı xilas edə biləcək ən vacib amillərdən biridir. Lakin qanunvericilikdə bəzi istisna hallar nəzərdə tutulub ki, bu zaman təhlükəsizlik kəmərindən istifadə edilməməsinə icazə verilir.

Oxu.Az-ın "Qanun nə deyir?" rubrikasının bugünkü mövzusu təhlükəsizlik kəmərindən istifadə edilməməsi ilə bağlıdır.

Kimlər təhlükəsizlik kəmərindən istifadə etməyə bilər?


"Yol hərəkəti haqqında" Azərbaycan Respublikasının Qanununa əsasən, aşağıdakı hallarda və şəxslər tərəfindən təhlükəsizlik kəmərinin bağlanmamasına yol verilir:

- 12 yaşınadək uşaqlar;

- Hamilə qadınlar;

- Nəqliyyat vasitəsini geriyə doğru idarə edən (geriyə manevr edən) sürücülər;

- Sürücülüyü öyrənən şəxs avtomobili idarə edərkən həm onun özü, həm də sükan arxasında əyləşən təlimçi (öyrədən şəxs);

- Yaşayış məntəqələrində olarkən - operativ nəqliyyat vasitələrinin (təcili tibbi yardım, yanğınsöndürən, polis və s.) həm sürücüləri, həm də sərnişinləri.