ABŞ prezidenti Barak Obama və Almaniya kansleri Angela Merkel Rusiyaya qarşı sanksiyaları davam etdirməyin zəruri olduğunu bəyan ediblər. Musavat.com –un xarici KİV-ə istinadən verdiyi xəbərə görə, bu barədə Ağ Evin mətbuat xidməti açıqlama yayıb.

Məlumata görə, “Böyük yeddilər”in (G7) Almaniyadakı birinci plenar iclasından öncə Obama və Merkel göz-gözə görüşüblər.

İki dövlətin rəhbərləri “Moskvaya qarşı sanksiyaların Moskvanın Ukraynaya dair Minsk anlaşmasını tam həcmdə yerinə yetirməsindən birbaşa asılı olması” haqda razılığa gəliblər.

Bundan əlavə, liderlər həmçinin, Transatlantik ticarət və sərmayə tərəfdaşlığını müzakirə ediblər və gələcək anlaşmalar çərçivəsində birgə fəaliyyətin önəmini qeyd ediblər.