Kiyev Vaşinqtonla dörd ikitərəfli sənəd imzalamağa ümid edir: Silah təchizatı, pilotsuz uçuş aparatlarının istehsalı, azad ticarət və təhlükəsizlik zəmanətləri barədə.
Bu barədə Ukrayna prezidenti ofisinin rəhbəri Andrey Yermak "Rada" telekanalının efirində çıxışı zamanı bildirib.
Onun sözlərinə görə, Ukraynanın texniki heyəti bu sənədlərdən ikisi üzrə danışıqlar aparmaq üçün bu həftə ABŞ-də olacaq.
"Bu həftə texniki nümayəndə heyəti iki mühüm müqavilənin imzalanmasına hazırlığı müzakirə etmək üçün ABŞ-də olacaq. İnanıram ki, yaxın vaxtlarda mən də ABŞ-də olacağam. Oktyabrın ortalarında baş nazirimizin səfəri planlaşdırılır. Beləliklə, iş davam edir", - o qeyd edib.