Yeni arxeoloji tədqiqat İber Yarımadasında (indiki İspaniya və Portuqaliya) dəmir dövrünə aid qəbirlərdə tapılan metal geyim aksesuarlarına əsaslanaraq, min illər əvvəlki dəfn geyimlərini yenidən bərpa etməyə çalışır.

Bu barədə "Haber Global" xəbər verir.

Tədqiqatçılar tekstil qalıqlarının demək olar ki, tamamilə məhv olduğu bu dövrdə, fibula, kəmər toqası kimi metal hissələrin və insan sümüklərinin mövqelərini təhlil edərək geyimlərin quruluşunu müəyyənləşdiriblər.

Araşdırma Sevilyadakı La Anqorilla, Portuqaliyadakı Beja nekropolları və Badajozdakı Medellin ərazilərində aparılıb. La Anqorillada bürünc "kelt tipi" toqalar və kətan qalıqları aşkarlanıb ki, bu da bəzilərinin dəridən, bəzilərinin isə daha yüngül parçalardan ibarət geyimlər geyindiyini göstərir. Bejada isə tam bir kəmərin tapılması, dəfn mərasimlərinin sadə deyil, müəyyən sosial statusu ifadə edən geyimlərlə keçirildiyini sübut edir.

Medellində aparılan qazıntılar xüsusilə maraqlıdır - burada kremasiya (yandırma) ənənəsi hakim olub, buna baxmayaraq çoxsaylı fibulalar və kəmər hissələri tapılıb. Qadın və kişi məzarlarında geyim aksesuarlarının fərqli bölgüsü gözlənildiyindən daha elastik olub, bu da o dövr cəmiyyətlərində geyim normalarının sosial və simvolik anlamlar daşıdığını göstərir.

Tədqiqatın müəllifləri bildirirlər ki, məqsəd təkcə qədim "dəfn modasını" bərpa etmək deyil, həm də İber Yarımadasının proto-tarixi dövrlərində geyimin rituallar və sosial kimlik üzərindəki rolunu anlamaqdır.