Süni intellekt sahəsində aparıcı texnologiya şirkətlərindən biri olan "OpenAI", 1 trilyon dollarlıq infrastruktur genişlənmə planı üçün ABŞ hökumətindən kredit zəmanəti tələb edib.

Valyuta.Az-ın verdiyi xəbərə görə, şirkətin maliyyə işləri direktoru (CFO) Sara Frayar (Sarah Friar) "Wall Street Journal" tərəfindən təşkil edilən bir iş konfransında çıxış edərək bildirib ki, bu investisiya planı əsasən süni intellekt hesablama infrastrukturunun inkişafını hədəfləyir.

Frayar qeyd edib ki, federal kredit zəmanətləri təmin olunduğu təqdirdə borclanma xərcləri əhəmiyyətli dərəcədə azalacaq və "OpenAI" maliyyə bazarlarına daha geniş çıxış imkanı əldə edəcək. Bildirilib ki, bu addım vasitəsilə şirkət banklar, özəl kapital fondları və ehtimal ki, ABŞ dövlətini də əhatə edən çoxpilləli maliyyə ekosistemi qurmağı planlaşdırır. Zəmanətlərin, mümkün ödəniş çətinliyi halında kredit verənləri qoruyacağı da vurğulanıb.

Hazırda IPO planlaşdırılmır

Sara Frayar əlavə edib ki, şirkətin yaxın müddətdə birja çıxışı (IPO) ilə bağlı hər hansı planı yoxdur. Onun sözlərinə görə, hələlik açıq səhmdar quruluşuna keçid nəzərdə tutulmur və əsas hədəf qlobal miqyasda uyğunlaşa bilən, çevik bir korporativ struktur formalaşdırmaqdır.

Ötən həftə yayılan bəzi xəbərlərdə "OpenAI"ın dəyərinin 1 trilyon dollara çata biləcəyi və buna görə birja çıxışı prosesinin planlaşdırıldığı iddia olunmuşdu. Lakin şirkət nümayəndələri bu iddiaların əksinə olaraq, diqqətlərinin tam şəkildə böyümə strategiyaları və genişlənə bilən struktur inkişafına yönəldiyini bildiriblər. Şirkət böyüməni xüsusi maliyyələşmə mənbələri ilə davam etdirməkdə qərarlıdır və bu mövqeyini hələ dəyişməyib.