Yaxın Şərqdə gərginliyin artması fonunda Hörmüz boğazında dəniz trafiki ötən həftə ilə müqayisədə 90% azalıb.

"BBC"-nin yaydığı məlumata görə, bir çox neft tankeri İranın hücumuna məruz qalmamaq üçün bu su yolundan keçməkdən imtina edir. Trafikin kəskin azalmasının digər mühüm səbəbi isə iri sığorta şirkətlərinin Fars körfəzində fəaliyyət göstərən gəmilər üçün hərbi risk sığortasını ixtisar etməsi və ya tamamilə ləğv etməsidir.

İslam İnqilabı Keşikçiləri Korpusunun (SEPAH) Hərbi Dəniz Qüvvələri komandanının müavini Məhəmməd Əkbərzadə bildirib ki, İran Hörmüz boğazında neft tankerləri, ticarət və balıqçılıq gəmiləri də daxil olmaqla bütün növ nəqliyyat vasitələrinin hərəkətinə qadağa qoyub. Bu qərar bölgədəki hərbi gərginliyin pik həddə çatdığını göstərir.

SEPAH komandanının müşaviri İbrahim Cabari isə daha sərt bəyanatla çıxış edərək, boğazdan keçməyə cəhd edən istənilən gəminin məhv ediləcəyini vurğulayıb. O əlavə edib ki, İran zərurət yarandığı təqdirdə Yaxın Şərqdəki bütün boru kəmərlərinə zərbə endirməyə və regiondan neft ixracını tamamilə bloklamağa hazırdır.