1955-ci ilin məşhur diplomatik ziyafətinin menyusu ilk dəfə Almaniyada təqdim olunacaq

1955-ci ildə Almaniya kansleri Konrad Adenauerin Moskvada təşkil etdiyi tarixi ziyafətin menyusu Almaniyada böyük marağa səbəb olub.

Moderator.az xəbər verir ki, bu barədə "dw.com" nəşri yazıb.

Məlumatda deyilir ki, həmin axşam SSRİ rəhbəri Nikita Xruşşov və sovet nümayəndə heyətinə təqdim olunan yeməklər bu ilin payızında ilk dəfə Köln şəhərində xüsusi tədbir çərçivəsində hazırlanacaq.

Diplomatiyaya xidmət edən ziyafət

Tarixi ziyafət 1955-ci ilin sentyabrında Almaniya Federativ Respublikası ilə SSRİ arasında keçirilən ilk rəsmi danışıqlar zamanı təşkil olunub. Çətin keçən danışıqların sonunda tərəflər diplomatik münasibətlərin qurulması və son alman hərbi əsirlərinin və mülki şəxslərin vətənə qaytarılması barədə razılığa gəlib.

Tarixçilərin fikrincə, həmin səfər Qərbi Almaniyanın yeni Şərq siyasətinin başlanğıcı hesab olunur. Köln şəhərində keçiriləcək tədbirin təşkilatçıları hesab edirlər ki, o vaxt süfrə arxasında yaranan səmimi ab-hava da tərəflər arasında etimadın formalaşmasına müəyyən töhfə verib.

Tarixi menyu müasir təqdimatda

Ziyafət Köln Kafedralının yaxınlığında yerləşən və 160 ildən artıq tarixə malik "Excelsior Hotel Ernst" hotelində keçiriləcək. Mətbəx komandası 1955-ci ilin menyusunu olduğu kimi deyil, onun müasir interpretasiyasını hazırlayacaq. Arxiv sənədlərinə görə, o dövrdə qonaqlara qaz ciyəri paşteti, tısbağa şorbası, qulançarla vetçina, qaynadılmış qızılbalıq, cüyür budu və "Qara meşə" deserti təqdim olunub. Hər yeməyə Almaniyanın seçilmiş şərabları uyğunlaşdırılacaq.

"Şərab diplomatiyası"nın rəmzi

Təşkilatçılar bildirirlər ki, həmin görüşdə Mosel bölgəsinin məşhur "Bernkasteler Doctor Riesling" şərabının süfrəyə verilməsi danışıqların gərginliyini azaltdığı üçün sonradan bu hadisə "şərab diplomatiyası" kimi tarixə düşüb. Adenauer daha sonra Nikita Xruşşov, Nikolay Bulqanin və Vyaçeslav Molotova həmin şərabdan hədiyyə olaraq bir yeşik göndərib.

Tədbirin təşkilatçıları vurğulayır ki, "Moskva menyusu"nun bugünkü Rusiya ilə heç bir siyasi əlaqəsi yoxdur. Layihənin məqsədi Konrad Adenauerin 150 illik yubileyini qeyd etmək, onun diplomatik fəaliyyətini və dialoqun tarixi əhəmiyyətini xatırlatmaqdır. Axşam yeməyi zamanı iştirakçılara həmin dövrün diplomatiyası və şərab mədəniyyəti haqqında da məlumat veriləcək.