Rusiya eyni vaxtda Suriya prezidenti Bəşər Əsədi müdafiə edib İŞİD terror qruplaşması ilə mübarizə apara bilməz.

Musavat.com “Reuters”ə istinadən xəbər verir ki, bu barədə Böyük Britaniyanın xarici işlər naziri Filipp Xammond Mançesterdə Konservatorlar Partiyasının konfransında bildirib.

“Onun (Əsədin –red.) Rusiya tərəfindən dəstəklənməsi Suriya müxalifətini İŞİD-in əlinə təhvil verəcək. Bununla da Putinin sözləri ilə desək, onun məhv eləmək istədiyi şər daha da güclənmiş olacaq” – nazir qeyd edib.

Bundan qabaq XİN başçısı Rusiyanın Suriyada İŞİD-lə mübarizə aparmaq istəyini alqışlamışdı, lakin əlavə eləmişdi ki, Moskva aviazərbələrin Suriya müxalifət qüvvələrinə deyil, məhz İŞİD-çilərə ünvanlandığını təsdiq eləməlidir.