"Tesla"nın (TSLA.O) baş direktoru İlon Mask (Elon Musk) cümə axşamı səhmdarların təsdiqi ilə korporativ tarixdə ən böyük əməkhaqqı paketini qazanıb.

"Reuters"in verdiyi xəbərə görə, investorlar onun elektrikli avtomobil istehsalçısını süni intellekt və robototexnika nəhənginə çevirmək planını dəstəkləyiblər.

Təklif 75 faizdən çox səs çoxluğu ilə qəbul edilib və Mask "Tesla"nın Texas ştatının Ostin şəhərindəki zavodunda keçirilən illik yığıncaqda səhnəyə robotların müşayiəti ilə çıxıb.

Artıq dünyanın ən varlı adamı olan Mask növbəti on il ərzində 1 trilyon dollara qədər dəyərində səhm əldə edə bilər, baxmayaraq ki, tələb olunan ödənişlər bu məbləği 878 milyard dollara endirəcək.

Bu səsvermə "Tesla"nın gələcəyi və dəyəri üçün həlledici sayılır, çünki şirkətin taleyi Maskın sürücüsüz avtomobillər istehsal etmək, ABŞ boyu robotaksi şəbəkəsi qurmaq və humanoid robotlar satmaq vizyonundan asılıdır. Bununla belə, onun son aylarda səsləndirdiyi sağçı siyasi fikirlər bu il "Tesla" brendinə mənfi təsir göstərib.

Şirkət rəhbərliyi xəbərdarlıq edib ki, əgər Mask bu əməkhaqqı paketini almasa, "Tesla"dan gedə bilər. Bəzi investorlar planı olduqca baha və lazımsız saysalar da, digərləri bunu Maskı şirkətdə saxlamağın və səhmdarlara əlavə gəlir təmin etməyin yolu kimi qiymətləndiriblər.

Mask çıxışında belə deyib: “Biz indi təkcə ‘Tesla’nın gələcəyinin yeni bir fəsli deyil, tamamilə yeni bir kitabı üzərində işləməyə başlayırıq.”

O, səhnədə bir sıra vədlər verib – aprel ayında sükanı olmayan iki nəfərlik robotaksi modeli "Cybercab"ın istehsalına başlanacağını və növbəti nəsil elektrikli idman avtomobili "Roadster"in təqdim ediləcəyini bildirib. Həmçinin o qeyd edib ki, "Tesla" süni intellekt çipləri istehsal etmək üçün “nəhəng çip zavoduna” ehtiyac duyur və bu məqsədlə "Intel" ilə əməkdaşlıq imkanlarını nəzərdən keçirmək lazımdır.

Səhmdarlar eyni zamanda direktorlar şurasının üç üzvünü yenidən seçib, bütün üzvlərin hər il seçilməsi təklifini dəstəkləyib və hazırda məhkəmədə dayandırılan əvvəlki planın yerinə yeni əməkhaqqı paketini təsdiqləyiblər.

Mask zarafatla deyib: “Digər şirkətlərin səhmdar toplantıları yuxuludur, amma bizimkisi partlayış kimi keçir. Baxın, bu, möhtəşəmdir.”

Səhmdarlar "Tesla"nın Maskın süni intellekt startapı olan "xAI"ya sərmayə qoymasına da səs veriblər, baxmayaraq ki, bir çoxu bitərəf qalıb. "Longacre Square" məsləhət şirkətinin tərəfdaşı Cessika Makduqal (Jessica Macdougall) bildirib ki, bu, böyük investorların daha ciddi nəzarət olmadan bu razılaşmaya tam razılıq verməkdə tərəddüd etdiklərini göstərə bilər.