Çində lüks restoranlarda bir nəfərlik şam yeməyinin qiyməti yüzlərlə, bəzi məkanlarda isə 1 000 dollardan çox ola bilər. Ölkənin ən bahalı restoranları arasında Çin mətbəxi ilə yanaşı, Yaponiya və Fransa mətbəxini təqdim edən məkanlar da yer alır.

1. "Kyoto Kaden Minokichi Kaiseki-Ryori" – 1 150 dollar

Pekində "Pangu Hotel"də yerləşən restoran siyahının ən bahalı məkanıdır. Burada bir nəfər üçün yeməyin qiyməti təxminən 1 150 dollara çatır. Restoran əsasən Yaponiyadan gətirilən məhsullarla hazırlanan ənənəvi çoxmərhələli "kaiseki" menyusu təqdim edir.

2. "Diaoyutai State Guesthouse" – 220 dollar

Pekində yerləşən diplomatik kompleks xarici dövlət rəsmilərinin qəbulu ilə də tanınır. Burada altı yeməkdən ibarət menyu təqdim olunur. Kompleksi əhatə edən lüks tur paketlərinin qiyməti 200–400 dollar arasında dəyişir.

3. "Fu 1015" – 215 dollar

Şanxay mətbəxinin ənənəvi yeməklərini təqdim edən "Fu 1015" Çinin lüks restoranlarından hesab olunur. Burada bəzi menyuların qiyməti adambaşına 215 dollara qədər yüksəlir.

4. "L'Atelier de Joël Robuchon" – 210 dollar

Şanxayda yerləşən restoran Fransa mətbəxi ilə tanınır. Burada bir nəfər üçün hesab seçilən menyudan asılı olaraq 90–210 dollar arasında dəyişə bilər.

5. "NOBU Beijing" – 152 dollar

Pekində fəaliyyət göstərən "NOBU" məşhur aşpaz Nobuyuki Matsuhisa və aktyor Robert de Nironun ortaq olduğu restoran şəbəkəsinə daxildir. Bir nəfərin orta hesabla 152 dollar xərclədiyi restoranda Yaponiya və Cənubi Amerika mətbəxinin elementlərini birləşdirən yeməklər təqdim olunur.

6. "Oyster Talks" – 105 dollar

Pekində yerləşən dəniz məhsulları restoranında bir nəfər üçün hesab təxminən 105 dollardır. Menyuda yerli məhsullarla yanaşı, Fransa, Avstraliya və Yeni Zelandiyadan gətirilən dəniz məhsulları da yer alır.

7. "Faigo Hotpot" – 100 dollar

Şanxayda yerləşən "Faigo Hotpot"da bir nəfər üçün orta xərc təxminən 100 dollardır. Restoran müxtəlif dəniz məhsulları, ət və fərqli bulyon seçimləri ilə tanınır.