Fransa Milli Assambleyası evtanaziyanı leqallaşdırıb. Müvafiq qanun layihəsi 291 deputatın lehinə, 241 deputatın isə əleyhinə səs verməsi ilə qəbul edilib.

Bu barədə meduza.io yazıb.

Məlumata görə, evtanaziya hüququndan xəstəliyi sağalmaz olan və son mərhələdə olan yetkinlik yaşına çatmış Fransa vətəndaşları istifadə edə biləcəklər. Bunun üçün əsas şərt müalicə ilə aradan qaldırılması mümkün olmayan davamlı fiziki və ya psixoloji əzabların mövcudluğudur.

Həyatına könüllü şəkildə son qoymaq istəyən şəxs həkimlər komissiyasının icazəsini aldıqdan və qərarını dəyişmək imkanı verən əlavə gözləmə müddəti başa çatdıqdan sonra ölümcül inyeksiyanı özü etməlidir.

Pasiyent bunu müstəqil şəkildə edə bilmədiyi halda inyeksiyanı həkim və ya tibb bacısı vura bilər.

Bununla Fransa könüllü şəkildə həyata son qoyulmasını leqallaşdıran dünyada 11-ci ölkə olub. Avropada evtanaziyaya Niderland, Belçika, Lüksemburq, Portuqaliya və İspaniyada da icazə verilir.