Hakerlər 5,7 milyon “Qantas” müştərisinə məxsus şəxsi məlumatları “dark web”də yayıblar.

Hadisə “Salesforce” şirkətinə qarşı həyata keçirilən kütləvi kibertəhlükə hücumundan sonra baş verib.

Avstraliyanın aviaşirkəti “Qantas” iyul ayında bulud texnologiyaları nəhəngi “Salesforce”a qarşı yönəlmiş hücumdan zərər çəkən 40 şirkətdən biri olub. Hücumu “Scattered Lapsus$ Hunters” adlı haker qrupu həyata keçirib. Qrup daha əvvəl “Toyota”, “Disney” və “IKEA” kimi tanınmış brendlərin də məlumat bazalarına müdaxilə edib.

Hakerlər bu həftənin əvvəlində məlumatların ictimaiyyətə açıqlanacağı ilə bağlı xəbərdarlıq etmişdilər. Onlar yaydıqları bəyanatda bildiriblər:

“Əgər ‘Salesforce’ bizimlə əlaqə saxlamasa və məsələni həll etməsə, onların bütün müştərilərini fərdi şəkildə hədəfə alacağıq. Tələblərimizə əməl edilməməsi ciddi nəticələrə səbəb olacaq”.

“Salesforce” buna cavab olaraq rəsmi mövqeyini açıqlayıb:

“Biz heç bir şantaj tələbi ilə əlaqəyə girməyəcək, danışıqlar aparmayacaq və ödəniş etməyəcəyik”.

İstintaq məlumatlarına görə, hakerlər birbaşa “Salesforce” sisteminə daxil ola bilməyiblər. Onlar hücuma məruz qalan şirkətlərin İT dəstək komandaları ilə əlaqə saxlayaraq özlərini əməkdaş kimi təqdim ediblər.

“Qantas”ın konkret vəziyyətində hücumun Filippində yerləşən çağrı mərkəzinə yönəldiyi ehtimal olunur. Sızdırılan məlumatlar arasında sərnişinlərin doğum tarixi, elektron poçt ünvanı və tez-tez uçan sərnişin nömrələri yer alır.

Avstraliyanın Kibertəhlükəsizlik üzrə Koordinatoru general-leytenant Mişel Makkginness Senatda bildirib ki, sızdırılan məlumatlar arasında bəzi siyasətçilərin ev ünvanları və telefon nömrələri də var:

“Bir təhdid aktoru məlumatları oğurladığını iddia edib. ‘Qantas’ bu hadisədən təsirlənən şəxslərə bildiriş göndərib. Hazırda həmin məlumatların hakerlər tərəfindən saxlanıldığı ehtimal olunur. Əməliyyat mütəxəssisləri bu məlumatların doğruluğunu yoxlayacaqlar”.

İlkin məlumatlara əsasən, kredit kartı və pasport məlumatları sızdırılmayıb.