Əksər insanlar Samsung adını eşidəndə ilk olaraq smartfon, televizor və ya məişət texnikasını düşünür. Halbuki bu Cənubi Koreya nəhəngi dünyanın ən böyük və ən müxtəlif fəaliyyət sahələrinə malik korporasiyalarından biridir. Samsung təkcə elektronika istehsal etmir, həm də çip istehsalından göydələn tikintisinə, dərman hazırlanmasından neft emalına qədər bir çox strateji sahədə fəaliyyət göstərir.

Dünyanın ən qabaqcıl çiplərini istehsal edir

Samsung dünyanın ən böyük yarımkeçirici (çip) istehsalçılarından biridir. Şirkət yaddaş çiplərində (DRAM və NAND Flash) uzun illərdir dünya lideridir. Bundan başqa, Samsung qabaqcıl prosessorların istehsalı ilə də məşğuldur və müxtəlif texnologiya şirkətləri üçün sifariş əsasında çiplər hazırlayır.Bu çiplər smartfonlarda, kompüterlərdə, avtomobillərdə, məlumat mərkəzlərində və süni intellekt sistemlərində istifadə olunur.

Telefon ekranlarının görünməyən kralı

“Samsung Display” dünyanın ən böyük “OLED” ekran istehsalçısı hesab olunur. Maraqlısı odur ki, Samsung yalnız öz telefonları üçün deyil, digər məşhur brendlər üçün də ekran hazırlayır.Bir çox premium smartfonlarda istifadə olunan “OLED” panellər Samsung tərəfindən istehsal edilir. Şirkətin ekran texnologiyaları qatlanan telefonlardan tutmuş avtomobil displeylərinə qədər geniş istifadə olunur.

Biotexnologiya və dərman istehsalı

“Samsung BioLogics” son illərdə dünyanın ən böyük biotexnologiya şirkətlərindən birinə çevrilib.Şirkət bir çox qlobal əczaçılıq şirkəti üçün bioloji dərmanlar istehsal edir. Xərçəng, immun sistemi və digər mürəkkəb xəstəliklərin müalicəsində istifadə olunan müasir preparatların istehsalında Samsung mühüm rol oynayır.

Dünyanın ən məşhur göydələnlərini tikib

“Samsung C&T” tikinti sahəsində də dünyanın aparıcı şirkətlərindəndir.Şirkət dünyanın ən hündür binası olan Burj Khalifanın əsas podratçılarından biri olub. Bundan başqa, “Petronas Towers” və “Taipei 101” kimi simvolik layihələrin tikintisində də iştirak edib.Beləliklə, Samsung təkcə cibimizdə deyil, dünyanın siluetində də iz buraxıb.

Elektrikli avtomobillərin batareyalarını hazırlayır

“Samsung SDI” elektrik avtomobilləri üçün batareyalar istehsal edən aparıcı şirkətlərdən biridir.Bu batareyalar bir çox avtomobil istehsalçıları tərəfindən istifadə edilir. Şirkət həmçinin enerji saxlama sistemləri və sənaye batareyaları da istehsal edir.Elektrikli avtomobil bazarının böyüməsi Samsung üçün ən sürətlə inkişaf edən istiqamətlərdən biridir.

Dünyanın ən böyük gəmi istehsalçılarından biridir

“Samsung Heavy Industries” nəhəng yük gəmiləri, “LNG” daşıyan tankerlər, neft platformaları və dəniz qurğuları istehsal edir. Şirkət Cənubi Koreyanın gəmiqayırma sənayesinin əsas oyunçularından biridir və dünyanın müxtəlif ölkələri üçün iri dəniz layihələri həyata keçirir.

Neft emalı və neft-kimya sənayesində də fəaliyyət göstərir

Samsung-un enerji sahəsindəki fəaliyyəti də kifayət qədər genişdir. “Samsung TotalEnergies” 2Petrochemicals” vasitəsilə neft məhsulları, plastik xammalları və müxtəlif kimyəvi maddələr istehsal olunur. Bu məhsullar avtomobil, tikinti, qablaşdırma və elektronika sənayesində istifadə edilir.

Dünyanın ən böyük reklam agentliklərindən biri

Bir çox insan “Cheil Worldwide” adını eşitməsə də, bu şirkət qlobal reklam sənayesinin nəhənglərindən biridir. 1973-cü ildə Samsung tərəfindən yaradılan “Cheil Worldwide” hazırda dünyanın onlarla ölkəsində fəaliyyət göstərir. Şirkət marketinq strategiyaları, reklam kampaniyaları, rəqəmsal kommunikasiya və brend idarəçiliyi sahəsində xidmət göstərir. Samsung-un qlobal reklamlarının böyük hissəsi məhz bu agentlik tərəfindən hazırlanır. Bununla yanaşı, Cheil Worldwide bir çox beynəlxalq brendə də xidmət göstərir.

Öz əyləncə parkına sahibdir

Samsung-un idarə etdiyi Everland Resort Cənubi Koreyanın ən böyük əyləncə parkıdır. Kompleksə attraksion parkı, su parkı, safari zonası, zoopark, botanika bağları və mövsümi festivallar daxildir. Hər il milyonlarla turist Everland-ı ziyarət edir. Park xüsusilə dünyanın ən yaxşı taxta və hibrid roller coaster-lərindən biri hesab olunan T Express attraksionu ilə məşhurdur.

Samsung əslində nədir?

Samsung sadəcə telefon istehsal edən şirkət deyil. O, elektronika, yarımkeçiricilər, biotexnologiya, tikinti, gəmiqayırma, enerji, kimya, reklam və əyləncə sektorlarını əhatə edən nəhəng biznes imperiyasıdır.

Bu gün istifadə etdiyiniz telefonun ekranı, mindiyiniz elektrik avtomobilinin batareyası, gördüyünüz göydələn, qəbul etdiyiniz bioloji dərman və hətta izlədiyiniz reklam kampaniyasının arxasında belə Samsung şirkətlər qrupunun izi ola bilər.

Şəbnəm İbrahimxəlilova