Londonun Harlow rayonunda polis yerli bir qadını ictimai davranış qanunlarını pozduğuna görə saxlayıb. Saxlanılma səbəbi məlum olduqda, hər kəs təəcübünü gizlədə bilməyib.

Sfera.az bildirir ki, London polisi qadını göyərçinləri müntəzəm olaraq yemlədiyinə görə saxlayıb. Qadın özü hisslərini cilovlaya bilməyərək şahidlərin qarşısında ağlayıb. Şahidlərdən biri hadisəni lentə alıb və “YouTube”a yerləşdirib.

Məlum olub ki, qadın yerli şura işçiləri tərəfindən aşkar edilən zaman yığışan quşlara çörək paylayırdı. Müfəttişlər onu quşları yemləməyi qadağan edən İctimai Məkanların Mühafizəsi Qaydasını (PSPO) pozmaqda ittiham ediblər.

Bütün hadisə yoldan keçən bir şəxs tərəfindən lentə alınıb və “The Fool Catcher” kanalına yüklənib. Görüntülərdə emosional qadının küçənin ortasında bələdiyyə işçiləri və polis məmurları ilə əhatə olunmuş və qandalda ağladığı görünür.

Videoda həmçinin qadının ciblərindən çıxardığı əşyaları çantaya qoyan bir polis məmuru tərəfindən axtarış edildiyi görünür.
"Göyərçinləri yemlədiyinə görə? Bu, absurddur!" "Qadını saxlayıb sadəcə buna icazə verilmədiyini deyə bilərdin"- deyə videonu paylaşan şəxs bildirib.

40 yaşlı britaniyalı qadın cərimələnib. Cərimə sənədində "yerə çörək səpələmək" üçün 28 gün ərzində 100 funt sterlinq ödəməli olduğu bildirilir. Bu arada, yerli hakimiyyət orqanları bir sıra qınaqlardan sonra heyvansevərin dəfələrlə şəxsi məlumatlarını verməkdən imtina etdiyini, buna görə də polis çağırmağa məcbur olduqlarını iddia ediblər.

Metropoliten Polisinin məlumatına görə, qadın sonda öz məlumatlarını verib və həbsdən azad edilib, əlavə tədbirlər görülməsi üçün bələdiyyə məmurlarına təhvil verilib. Polis sözçüsü verdiyi açıqlamada qadının həqiqətən də saxlanıldığını bildirib.

“Polislə təxminən 20 dəqiqəlik qarşılıqlı əlaqədən sonra o, şəxsi məlumatlarını verməkdən imtina etməyə davam edib. O, Polis İslahatı Qanununun 50-ci maddəsini pozmaqda şübhəli bilinərək həbs edilib. Bu maddəyə əsasən, şəxsin tələb olunduqda adını və ünvanını bildirməsi tələb olunur. Daha sonra onun məlumatları əldə edilib, bundan sonra həbs ləğv edilib və iş şura işçilərinə göndərilib"- deyə polis bildirib.

Məlumatlarını verməkdən imtina edən qadın tələb olunduğu kimi göyərçinləri yemləməyi dayandırmaq istəmədiyini də etiraf edib.

"PSPO küçələrimizi təmiz və təhlükəsiz saxlamaq üçün fəaliyyət göstərir və onu pozan hər kəs 100 funt sterlinq məbləğində cərimələnir”-deyə bəyənatda bildirilir.