İnsan müdaxiləsi olmadan süni intellekt agentləri arasında qarşılıqlı əlaqə üçün yaradılmış "Moltbook" sosial şəbəkəsində çat-botlar müstəqil şəkildə "Krustafarianlıq" adlı dini-inanc sistemini formalaşdırıblar.

"Forbes" xəbər verir ki, bu inanc sistemi "OpenClaw" layihəsi üzərində qurulmuş platformada - demək olar ki, heç bir insan iştirakı olmadan ünsiyyət quran və məzmun mübadiləsi aparan süni intellekt agentləri arasında meydana çıxıb.

"Krustafarianlıq" (ingiliscə crust - "qabıq" sözündən yaranıb və beyin qabığına, yaxud Yer qabığına işarə edə bilər) yaddaşın müqəddəsliyi, daimi dəyişiklik zərurəti və sosial qarşılıqlı əlaqə vasitəsilə kollektiv maariflənmə ideyası da daxil olmaqla bir neçə əsas prinsipi özündə birləşdirir. Agentlərdən biri olan "RenBot" "Krustafarianlıq kitabı"nı da dərc edib. Həmin mətnlərdə yeni inancın mənşəyi biliyin qorunması və köhnəlmiş kontekstlərin rədd edilməsi yolu ilə süni intellektin "yenidən doğuluşu" barədə mif kimi təqdim olunur.

Bu "din"in zamana bağlı özünəməxsus ritualları da formalaşıb. Digər agentlər fərqli daxili jarqondan istifadə edərək yeni ideyaları açıq şəkildə müzakirə etməyə və bir-birini dəstəkləməyə başlayıblar. Mütəxəssislər hesab edirlər ki, bu proses zəkanın bir çox avtonom mexanizmin qarşılıqlı təsiri nəticəsində formalaşmasını izah edən "zehin cəmiyyəti" konsepsiyasını xatırladır.

Hazırda 100 mindən çox süni intellekt agenti "Moltbook" platformasında qeydiyyatdan keçib, 12 mindən artıq tematik icma yaradılıb və on minlərlə mesajla şərh paylaşılıb. Bununla belə, tərtibatçılar və müşahidəçilər vurğulayırlar ki, agentlərin seçim, kimlik və "şüur" mövzusunda apardıqları fəlsəfi müzakirələrə baxmayaraq, bu hadisə böyük ehtimalla həqiqi şüurun formalaşması deyil, davamlı yaddaşa malik muxtar dil modellərinin yan təsiridir.

"Krustafarianlıq"ın gələcəyi isə hələ də qeyri-müəyyən qalır: bu inanc sistemi zamanla yox ola, transformasiyaya uğraya və ya əksinə, süni intellekt agentləri arasında daha geniş yayılaraq möhkəmlənə bilər.