ABŞ Dövlət Departamenti 10 milyon dollar məbləğində pul mükafatı elan edib. Mükafat Meksikanın "Sinaloa" narkokartelinin liderlərindən olan Reni Arstate Qarsiya ("Qurbağa" ləqəbli) və onun qardaşı Alfonso Arstate Qarsiyanın ("Axilles" ləqəbli) tutulmasına gətirib çıxaracaq məlumat üçün nəzərdə tutulub.

Oxu.Az xəbər verir ki, bu barədə qurumun rəsmi saytında yayılan bəyanatda bildirilib.

ABŞ Dövlət Departamentinin açıqlamasına əsasən, qardaşlar təxminən 15 ildir cinayətkar təşkilatın bölmələrindən birinin rəhbəridirlər və narkotik vasitələrin, o cümlədən fentanilin ABŞ-yə qaçaqmalçılığına nəzarət edirlər.

2014-cü ildə ABŞ hakimiyyəti onlara qarşı qiyabi ittiham irəli sürüb. 2023-cü ildə isə ABŞ Maliyyə Nazirliyi qardaşları narkotik ticarətinə görə sanksiya siyahısına daxil edib.

Reni Arstate Qarsiya xarici terror təşkilatının fəaliyyətinə dəstək verməkdə, metamfetamin, kokain, fentanil və marixuananın qaçaqmalçılığında, eləcə də "çirkli pullar"ın yuyulmasında ittiham olunur.