Rusiya servislərində əməliyyatdan sonra öd kisəsindən çıxarılmış daşları satan insanların onlarla elanı peyda olub.

Bu barədə "SHOT Proverka" "Telegram" kanalı məlumat verib.

Məlumata görə, qiymətlər kiçik nümunələr üçün bir neçə min rubldan tutmuş, "elit" daş üçün 100 000 rubla (2 000 manatdan çox) qədər dəyişir.

Satıcının sözlərinə görə, "elit" daş "işıq saçır və parıldayır". Bəziləri daşları "cəvahirat" adlandırır. Satışdan əldə edilən vəsaitləri rusiyalılar, həmçinin müalicəyə də xərcləməyi planlaşdırırlar. Paralel olaraq əlaqəli biznes də inkişaf edir: alıcılar qeyri-qanuni olaraq daşları Çinə ixrac etməyə başlayıblar və orada bu daşların xalq təbabətində istifadə olunduğu iddia edilir.

Baytarlıq klinikaları ev heyvanlarının sahiblərinə heyvanların daşlarını götürməyi və daşlardan bəzək əşyaları - təsbehlər, kulonlar və ya sırğalar hazırlamalarını təklif edirlər.