Rusiyada Perm Politexnik Universiteti və Yüksəktəmizlikli Maddələr Kimyası İnstitutunun alimləri infraqırmızı optika üçün yeni şüşə-keramika materialı hazırlayıblar.

Oxu.Az "Rambler"ə istinadən xəbər verir ki, yeni material mövcud analoqlarla müqayisədə 2,5 dəfə daha sərt və 1,5 dəfə daha çatadavamlıdır.

Material termal kameralar, gecəgörmə cihazları və kosmik teleskoplar üçün nəzərdə tutulub.

Tərkibi xalkogenid şüşə (qalium-germanium-selen) və sezium yodid əsasında hazırlanıb. Materialın daxilində formalaşan mikrokristallar çatların yayılmasının qarşısını alır və temperatur dəyişmələrinə davamlılığı artırır.

Alimlərin sözlərinə görə, bu yenilik vibrasiyaya, istiliyə və aşınmaya davamlı linzaların istehsalına imkan verəcək. Bu isə xilasetmə əməliyyatlarında, kosmik texnikada və ekstremal şəraitdə istifadə olunan optik cihazların etibarlılığını artıracaq.