"Daily Mail" qəzetinin yaydığı məlumata görə, Kral III Çarlzın qardaşı Endryu Mauntbatten-Vindzor amerikalı maliyyəçi Ceffri Epşteynlə əlaqələrinə dair araşdırma çərçivəsində polis tərəfindən saxlanılıb.

Məlumata əsasən, keçmiş şahzadə 66 yaşını qeyd etdiyi gün vəzifə səlahiyyətlərindən sui-istifadə etməkdə şübhəli bilinərək həbs edilib. Nəşr iddia edir ki, o, Böyük Britaniyanın ticarət nümayəndəsi kimi fəaliyyət göstərdiyi dövrdə Epşteynə məxfi məlumatlar ötürməkdə ittiham olunur.

Qeyd olunur ki, yanvarın 30-da ABŞ Ədliyyə Nazirliyi Epşteyn işi ilə bağlı yeni sənədlər paketi dərc edib. Həmin materiallarda Endryu Mauntbatten-Vindzora bənzədiyi deyilən bir şəxsin fotoşəkilləri yer alıb.

BBC isə bildirir ki, yayılan görüntülərdəki interyer Epşteynin Nyu-Yorkdakı malikanəsinin daxili görünüşü ilə üst-üstə düşür.

Hazırda məsələ ilə bağlı rəsmi qurumların əlavə açıqlaması gözlənilir.

Xatırladaq ki, Endryu rəsmi olaraq keçmiş şahzadədir. 2022-ci ilin yanvarında, Ceffri Epşteynlə əlaqələri və ABŞ-da açılmış məhkəmə iddiaları nəticəsində uzun skandallardan sonra, kraliça II Elizabet ona kral hərbi titullarını və krallığı təmsil etmə icazəsini ləğv edib