Süni intellektə artan tələbat və enerji məhdudiyyətləri Şimali Amerikanın rəqəmsal infrastruktur xəritəsini dəyişir.

Valyuta.az xəbər verir ki, "JLL" şirkətinin 2025-ci il üzrə Şimali Amerika Data Mərkəzi Hesabatına əsasən, Texas 2030-cu ilə qədər Virciniyanı geridə qoyaraq dünyanın ən böyük data mərkəzi bazarına çevrilə bilər.

Hesabatda bildirilir ki, hazırda Şimali Amerikada tikintisi davam edən data mərkəzi gücünün 64 faizi ənənəvi bazarlardan kənar ərazilərdə — Qərbi Texas, Tennessi, Viskonsin və Ohayo kimi ştatlarda yerləşir. Mövcud sahələr üzrə boşluq səviyyəsi isə ardıcıl ikinci ildir ki, rekord həddə — cəmi 1 faiz təşkil edir.

"JLL"in qlobal data mərkəzi komandasında idarəedici direktor vəzifəsində çalışan Kört Holkombun sözlərinə görə, Texas geniş torpaq sahələri və zəngin enerji resursları sayəsində investorlar üçün ən cəlbedici məkanlardan biridir. Ştat günəş və külək enerjisi, eləcə də təbii qaz ehtiyatları ilə böyük enerji gücünə malikdir. Hazırda Texasda 6,5 qiqavat gücündə data mərkəzi layihəsi tikilir ki, bu da ştatın liderliyə yüksələcəyi proqnozunu gücləndirir.

Şimali Virciniya uzun illərdir dünyanın ən böyük data mərkəzi bazarı hesab olunsa da, burada enerji gücü ilə bağlı məhdudiyyətlər mövcuddur. Virciniyanın şəbəkə operatoru "PJM" artan tələbat fonunda daha sərt enerji idarəetmə qaydaları tətbiq edib. Texasda fəaliyyət göstərən "ERCOT" da fövqəladə hallarda oxşar səlahiyyətlərə malikdir, lakin bir çox tərtibatçılar alternativ enerji mənbələrinə üstünlük verirlər.

"JLL" hazırda Şimali Amerika üzrə 39 qiqavat aktiv gücə malik 40-dan çox yeni bazarı izləyir. Bu gücün təxminən yarısı "Google", "Oracle" və "Amazon Web Services" kimi iri texnologiya şirkətləri tərəfindən istifadə olunur.

Şirkətin məlumatına görə, bazarda “süni intellekt köpüyü” ilə bağlı narahatlıqlar özünü doğrultmur. Ardıcıllıqla iki il rekord dərəcədə aşağı boşluq səviyyəsi qeydə alınıb və iri layihələrin əksəriyyəti əvvəlcədən icarə müqavilələri ilə təmin edilib. 2025-ci ildə data mərkəzləri üzrə icarə haqları 9 faiz artıb və 2030-cu ilə qədər illik orta hesabla 7 faizlik artım proqnozlaşdırılır.