Ukraynanın şimalındakı bir kənddən olan 12 yaşlı oğlan rus hücum dronuna qarşı çıxaraq ona qalib gəlib. Bu barədə “Washington Post” qəzeti xəbər verir.
Anatoli Proxorenko qonşusu üçün budaq kəsərkən armud ağacının üstündə idi ki, dronun vızıltısını eşitdi. Sonra ailələrinin həyətinə doğru, yerə çox yaxın uçan qara kvadrokopter gördü. Həmin vaxt həyətdə onun kiçik bacı-qardaşları və başqa uşaqlar oynayırdı. Oğlan dərhal başa düşdü ki, pilotsuz aparat uşaqları görüb və yəqin ki, hücuma hazırlaşır.
Anatoli bir neçə ay əvvəl ukraynalı əsgərin ona göstərdiyi üsulu xatırladı. Belə aparatlara radiosiqnal yox, uçuş zamanı arxasınca kilometrlərlə açılan çox nazik optik lif kabeli vasitəsilə nəzarət edilir. Buna görə də bu dronları elektron siqnalboğucularla sıradan çıxarmaq mümkün deyil.
Oğlan ağacdan tullandı, nazik kabelə tərəf qaçdı və onu tutdu. O, kabeli ilgəyə salıb dartdı və əsgərin dediyi təlimatı xatırladı: 15-ə qədər saymaq.
“Vaxtım yox idi,” — Anatoli “Washington Post” qəzetinə bildirib. — “Mən yalnız ona qədər saya bildim və kabeli qopardım.”
Dron operatorla əlaqəni itirdi. O, qəfil yuxarı qalxdı, istiqamətini dəyişdi və kəndin yaxınlığındakı bataqlıq əraziyə düşdü. Partlayış baş vermədi.
📌 Ukraynada kiçik FPV-dronların qurbanları getdikcə daha çox mülki şəxslər olur. Bu cihazlar rus operatorları tərəfindən idarə olunur, partlayıcı maddələrlə təchiz edilir və çox vaxt yerdən cəmi bir neçə metr yüksəklikdə uçur. Anatolinin kəndi Rusiya sərhədi yaxınlığında yerləşir və artıq uzun müddətdir belə hücumlarla üzləşir: tarlalarda traktorlar vurulub, avtomobillər zədələnib, hadisədən cəmi bir gün əvvəl isə dron onun küçəsindəki bir evə çırpılmışdı.
Bild.de