Zəngəzur dəhlizi və “Alican” sərhəd keçidi layihələri Türkiyənin regional ticarət şəbəkəsindəki rolunu yenidən müəyyənləşdirəcək.

Bu sözləri Türkiyənin nəqliyyat və infrastruktur naziri Abdulqadir Uraloğlu deyib.

O qeyd edib ki, Zəngəzur dəhlizi Türkiyə ilə Azərbaycanı birləşdirəcək, Asiyadan Avropaya yeni ticarət marşrutu yaradacaq:

“Bu, məsafələri qısaldacaq, xərcləri azaldacaq və Türkiyənin regional ticarət gücünü artıracaq”.

Uraloğlu Türkiyə-Ermənistan sərhədində yerləşən “Alican” sərhəd keçid məntəqəsində hazırlıq işlərinə başlanıldığını açıqlayıb.

"Biz körpünün hazırkı vəziyyətinin qiymətləndirilməsi və onun yenidən qurulması da daxil olmaqla planlarımızı tamamladıq. Biz sürətlə Azərbaycan və Ermənistanla konsensus prosesinə doğru irəliləyirik. Sülh prosesi başa çatdıqdan sonra “Alican” keçidi də açılacaq".

Nazir Azərbaycan və Ermənistan nazirləri ilə görüşdüyünü də bildirib.

“Burada ciddi nizamlanma prosesi gedir. Yəni Ermənistanın baş naziri əhəmiyyətli təşəbbüs göstərir və ciddi risklərə gedir. Biz bu prosesi yaxından izləyirik. Biz konkret planlar hazırlamışıq, o cümlədən “Alican” sərhəd qapısındakı körpünün hazırkı vəziyyətinin qiymətləndirilməsi və yeni körpünün tikintisi”, - deyə Uraloğlu qeyd edib.

O əlavə edib ki, Qars-İğdır-Aralıq-Dilucu dəmir yolu xəttinin tikintisi Zəngəzur dəhlizini birləşdirəcək və Orta (Transxəzər) Nəqliyyat Dəhlizini gücləndirəcək.\\BakuPost