ABŞ Ədliyyə Nazirliyi cinsi cinayətkar Epstein işi ilə bağlı istintaq materiallarının dərcinə başlayıb. Qanunla müəyyən edilmiş müddətin başa çatması ilə yüz minlərlə sənəd açıqlanıb. Bunlara ünvan kitabçası, fotolar və məhkəmə materialları daxildir.
Ünvan kitabçasında ABŞ Prezidenti Trampın, eləcə də bir çox digər tanınmış şəxslərin adları yer alır. Məlumatların demək olar ki, hamısı qaraldılıb. Kitabçanın kimə məxsus olduğu aydın deyil. Digər bir çox sənəd də, məsələn, bir məhkəmə sənədinin 119 səhifəsi qaraldılıb.
Ədliyyə nazirinin müavini Blanş bildirib ki, bütün materiallar ictimaiyyətə açılmayacaq, çünki hər səhifədə qurbanların şəxsiyyəti qorunmalıdır. Dəqiq neçə sənədin açıqlanması əvvəlcə bəlli olmayıb. Bununla belə, bütün sənədlərin dərc edilməsi üçün qanunla müəyyən edilmiş müddətə əməl olunmayıb. Senatda Demokratların azlıq lideri Şumer bunu Trampı onun “çirkin keçmişindən” qorumağa yönəlmiş ört-basdır əməliyyatı adlandırıb.
Klintonla bağlı yeni məlumatlar – Tramp barədə az məlumat
Trampın Epsteinlə əlaqələri barədə yalnız az sayda yeni detal mövcuddur. Lakin sənədlərdə sabiq prezident Klintonla bağlı yeni məlumatlar yer alır. Belə ki, bir fotoda Klinton Epsteinin tərəfdaşı Ghislaine Maxwell ilə üzgüçülük hovuzunda görünür. Bir sözçü X onlayn platformasında bildirib ki, Klinton Epsteinin cinayət əməlləri məlum olmamışdan əvvəl onunla əlaqəni kəsib. Tramp da Epsteinin cinayətlərindən xəbərdar olmadığını iddia edir.
Prezident Tramp və aparıcı respublikaçılar sənədlərin açıqlanmasını uzun müddət əngəlləmişdilər. Yalnız güclü təzyiqdən sonra Tramp geri çəkildi. Noyabr ayında Konqres tərəfindən qəbul edilən qanun Ədliyyə Nazirliyinə bütün sənədləri açıqlamaq üçün 30 gün vaxt vermişdi.
Hər şey dərc edilməli deyil
Qanuna görə, Ədliyyə Nazirliyi cinsi istismara dair görüntü və sənədləri hələ də gizli saxlaya bilər. Həmçinin, qanuna əsasən “şəxsi həyata açıq-aşkar əsassız müdaxilə” sayılan materiallar da dərcdən istisna edilə bilər. Mümkün federal istintaqlara və ya məhkəmə proseslərinə zərər vura biləcək məlumatların, eləcə də milli müdafiə və ya xarici siyasət maraqları baxımından məxfi saxlanılması zəruri olan informasiyaların dərcinə də maneə qoyula bilər.
Fotoların həqiqiliyi əvvəlcə müstəqil şəkildə təsdiqlənə bilməyib. Minlərlə fotonun hansı metodologiya ilə seçildiyi də aydın deyil. Fotoların nə vaxt çəkildiyi, kim tərəfindən çəkildiyi və Ədliyyə Nazirliyinin onları haradan əldə etdiyi də hələlik məlum olmayıb.
Multimilyoner Epstein illər boyu onlarla gənc qadını və azyaşlını istismar edən bir sui-istifadə şəbəkəsi idarə etmişdi. O, ən yüksək dairələrdə geniş əlaqələrə malik idi. Ona qarşı ilk məhkəmə prosesi 2018-ci ildə 18 aylıq həbs cəzası ilə başa çatdı. 2019-cu ildə Epstein yenidən həbs olundu, bir ay sonra isə kamerasında ölü tapıldı.
Sarvan Səmədoğlu
TEREF