Sosial şəbəkələrdə yayılan videoda Neftçala şəhərində Şəhid Pərviz Məmmədlinin adını daşıyan küçənin acınacaqlı vəziyyətdə olduğu görünür. Bu sadəcə təəssüf doğurmur, açıq-aşkar utancdır. Şəhidimizin adını daşıyan bir küçənin bu vəziyyətdə olması nə inkişafla, nə qayğı ilə, nə də dövlətçilik anlayışı ilə uzlaşır.

Bizimesr.az bildirir ki, bir müddət əvvəl bahalı plaşı ilə gündəmə gələn Neftçala Rayon İcra Hakimiyyətinin hörmətli başçısı Mirhəsən Seyidov tənqidlərə cavab olaraq, jurnalistləri və bu barədə yazanları Neftçalaya dəvət edib, rayondakı inkişafı yerində görməyə çağırmışdı.

Əziz Mirhəsən müəllim, budur dediyiniz inkişaf, Şəhid adı daşıyan küçə beləmi olmalıdır? Əgər Neftçalanın şəhid adını daşıyan bir küçəsi bu gündədirsə, rayonun digər küçələrinin və ümumi infrastrukturun vəziyyəti hansı haldadır?

Xüsusilə, son parlament seçkilərində Neftçaladan deputat olan Tənzilə Rüstəmxanlı seçki kampaniyası dövründə “Neftçala üçün birlikdə” şüarı ilə çıxış edirdi. Buyurun, Tənzilə xanım - birlikdə baxaq - Sizin deputat olduğunuz rayonda şəhid adına olan küçənin vəziyyəti budur. Və bu cür bərbad küçələr tək-tük deyil, saysız-hesabsızdır.

Şəhid adına hörmətsizlik edən idarəçilik sadəcə ayıbdır. İnsan bu mənzərəni görəndə ürəyi ağrıyır. Şəhidlərimiz bu torpağın ən müqəddəs dəyəridir. Onların adını daşıyan küçələr isə laqeydliyin yox, hörmətin və qayğının simvolu olmalıdır.

Qeyd edək ki, görüntünü əslən Neftçaladan olan, rayonun problemləri ilə yanaşı, uğurlarını, rayonun tanınmış şəxslərini tanıdan Etibar Cavadov paylaşıb.

Bizimesr.az