Yaxın Şərqdə gərginliyin yeni eskalasiya mərhələsinə qədəm qoyması qlobal diplomatiyaya ağır zərbə vurub. İran tərəfi İsrailin Livana qarşı hərbi əməliyyatlarını genişləndirməsinə etiraz olaraq, vasitəçilər vasitəsilə ABŞ ilə apardığı dolayı danışıqları və mesaj mübadiləsini tamamilə dayandırıb.

“AzPolitika” xəbər verir ki, bu barədə məlumatı İrana məxsus, SEPAH-a (İslam İnqilabı Keşikçiləri Korpusu) yaxınlığı ilə bilinən yarı-rəsmi "Tasnim" informasiya agentliyi yayıb.

"Tasnim" agentliyinin hökumət mənbələrinə istinadən yaydığı məlumata görə, İranın danışıqlar qrupu Vaşinqtonla mətndaxili və dolayı təmasları dondurmaq qərarı alıb. Səbəb kimi İsrailin Livan ordusuna və "Hizbullah" hədəflərinə qarşı hücumlarını artırması göstərilir.

İran tərəfinin mövqeyi kəskindir: "İranın və 'Müqavimət Cəbhəsi'nin tələbləri yerinə yetirilməyənə, İsrailin Livan və Qəzzadakı hərbi əməliyyatları dərhal və tamamilə dayandırılmayana qədər ABŞ-la heç bir dialoqdan söhbət gedə bilməz".

Xarici işlər naziri Abbas Araqçi də mövzu ilə bağlı xəbərdarlıq edərək bildirib ki, bir cəbhədə atəşkəsin pozulması bütün cəbhələrdə pozulması deməkdir və bunun məsuliyyəti birbaşa ABŞ və İsrailin üzərinə düşür.

Məlumata görə, Tehran və onun regional müttəfiqləri (Yəmən, Livan və İraqdakı şiə qruplaşmaları) İsrail və onu dəstəkləyən Qərb dövlətlərinə təzyiqi artırmaq üçün yeni strategiya üzərində razılaşıblar. Bu strategiyanın ən qorxulu bəndi qlobal neft və maye qaz daşımalarının əsas arteriyası sayılan Hörmüz boğazının tamamilə qapadılması və eyni zamanda Bab əl-Məndəb boğazında digər cəbhələrin aktivləşdirilməsidir.

İranın danışıqları dayandırması və dəniz yollarını bağlamaq təhdidi fonunda dünya bazarlarında neftin qiyməti kəskin sıçrayış edərək bir barrel üçün təxminən 97 dollara yaxınlaşıb.

İsrail ordusu Livanın cənubunda hərbi əməliyyatları davam etdirir. Son zərbələr nəticəsində 10-dan çox insanın öldüyü, 30-dan çox insanın isə yaralandığı bildirilir. "Hizbullah"ın cavab atəşi nəticəsində isə 1 İsrail əsgəri həlak olub. İsrail ordusu növbəti hücumlardan əvvəl yerli sakinləri evlərini tərk etməyə çağırıb.

"Al Jazeera" telekanalının amerikalı rəsmilərə istinadən verdiyi xəbərə görə, ABŞ Dövlət katibi eskalasiyanı yatırmaq üçün həftəsonu Livan prezidenti və İsrail baş naziri ilə ayrı-ayrılıqda danışıqlar apararaq yeni təkliflər paketi təqdim edib. Təklifə əsasən, "Hizbullah" İsrailə qarşı bütün hücumları dayandırmalı, İsrail isə paytaxt Beyrut və ətrafını hədəf almaqdan çəkinməli idi. Lakin Tehranın son qərarı bu diplomatik səyləri də boşa çıxarıb.

Vaşinqton hələlik İranın danışıqları dayandırması ilə bağlı rəsmi şərh verməyib.