Transformasiya naminə qurbanlar
Hörmətli əməkdaşlar,
Şirkətimizin növbəti "tarixi uğuru" çərçivəsində aparılmış dərin və yorulmaz təhlillər nəticəsində müəyyən edilmişdir ki, müəssisədə yaranan problemlərin səbəbi nə uğursuz qərarlardır, nə idarəetmə səhvləri, nə də illərlə davam edən plansız dəyişikliklər. Əsas problem maaş alan insanlardır.
Uzun araşdırmalardan sonra məlum olmuşdur ki, büdcəyə ən böyük zərəri gecə-gündüz işləyən, qəzalara çıxan, şaxtada donan, istidə yanan əməkdaşlar vurur. Çünki rəhbərlik səviyyəsində verilən səhv qərarların heç biri balans hesabatında xərc kimi görünmür, amma işçinin maaşı görünür.
Bu səbəbdən bir qrup əməkdaşın "optimallaşdırılması" qərara alınmışdır.
Sənədlərdə istifadə olunan "transformasiya", "səmərələşdirmə", "yenidənqurma", "struktur dəyişikliyi", "korporativ çeviklik" kimi ifadələrdən çəkinməyin. Bunlar sadəcə "adam ixtisar edirik" cümləsinin daha bahalı və təqdimata uyğun versiyasıdır.
İllərlə qaz xəttinin üstündə çalışan, qəzaların qarşısını alan, sistemi ayaqda saxlayan insanların xidmətləri yüksək qiymətləndirilmiş və bu qiymətləndirmənin nəticəsi olaraq onların iş yerlərinin ləğvi məqsədəuyğun hesab edilmişdir.
Çünki bu şirkətdə fədakarlığın ən yüksək mükafatı bir gün öz adını ixtisar siyahısında görməkdir.
Yeni idarəetmə modelinə əsasən:
- İşçi sayı azalacaq;
- İş yükü əhəmiyyətli dərəcədə artacaq;
- Stress normaya çevriləcək;
- Maaşlar yerində qalacaq;
- Rəhbərliyin təqdimatlarında isə məhsuldarlıq kosmik həddə çatacaq.
Çünki Excel cədvəllərində heç kim yorulmur.
Heç bir cədvəl gecə saat 03:00-da qəza yerinə getmir.
Heç bir qrafik şaxtada qaz xəttinin üstündə dayanmır.
Və ən əsası, heç bir rəqəm rəhbərliyin səhvləri barədə sual vermir.
Qalan əməkdaşlardan xahiş olunur ki, özlərini təhlükəsiz hesab etməsinlər. Bu gün siyahını hazırlayan tərəfdəsinizsə, sabah həmin siyahının içində ola bilərsiniz. Çünki transformasiya müqəddəs prosesdir və onun iştahası heç vaxt doymur.
Şirkət bununla bir daha sübut etdi ki, xərcləri azaltmağın ən asan yolu səhv qərarları azaltmaq deyil, həmin qərarların nəticələrini daşıyan insanları azaltmaqdır.
Nəticədə idarəetmənin yeni fəlsəfəsi formalaşmışdır:
Əgər problem həll olunmursa, problemi görən insanları azaldın.
Əgər nəticə yaxşılaşmırsa, hesabatı dəyişin.
Əgər rəqəmlər reallığı göstərmirsə, reallığı ixtisar edin.
Hörmətlə,
"İnsan kapitalını ən böyük sərvət adlandıran, lakin ilk fürsətdə onu balans hesabatında xərc sətri kimi silən rəhbərlik."
Dasqin Abbasov