Suriya Müdafiə Nazirliyinin əməkdaşı Hələbin Səyf əd-Dövlə rayonunda naməlum şəxslərin hücumu nəticəsində həlak olub.

Globalinfo.az xəbər verir ki, bu barədə “Syria TV” telekanalı məlumat yayıb.

“Levant 24” portalının məlumatına görə, Suriya təhlükəsizlik qüvvələrinin əməkdaşı xidməti yerinə çatarkən naməlum şəxslər tərəfindən atəşə məruz qalıb. O, aldığı güllə yaralarından yerindəcə keçinib.

SANA agentliyi bildirir ki, həmin rayonda Suriya ordusunun bölmələri kürdlərin rəhbərlik etdiyi Suriya Demokratik Qüvvələri (SDF) tərəfindən buraxılan düşmən PUA-larını məhv edib. Hadisə nəticəsində ölən və ya yaralananlar barədə əlavə məlumat verilməyib.

Xatırladaq ki, bir gün öncə Homs şəhərinin Vadi əl-Dəhəb rayonunda yerləşən məsciddə baş vermiş partlayış nəticəsində səkkiz nəfər ölüb, onlarla insan yaralanıb. Yerli rəsmilər “Reuters” agentliyinə bildiriblər ki, hadisəyə intiharçı və ya əvvəlcədən yerləşdirilən partlayıcı səbəb ola bilər.