Suriyanın Hələb şəhərində özlərini SDQ adlandıran, PKK-YPG kimi tanınan terror təşkilatına qarşı əməliyyatlar davam edir.

Patrul.az xarici KİV-ə istinadla xəbər verir ki, Suriya milli ordusu tərəfində Hələb şəhərindəki döyüşləri işıqlandıran suriyalı televiziya müxbiri canlı yayım zamanı bədbəxt hadisə ilə üzləşib.

Anbaan çəkilən görüntüdə hərbi fəaliyyət barədə reportaj hazırlayan sözügedən jurnalist arxadan yaxınlaşan Suriya milli ordusuna məxsus tankın zərbəsindən qəfildən yerə yıxılır. Bundan sonra yaxınlıqda olan Suriya ordusunun əsgərləri jurnalistin köməyinə gəliblər.

Məlumata görə, qəzanın baş verməsindən sonra yayım dayandırılıb. Hadisə nəticəsində isə jurnalistin vəziyyətinin yaxşı olduğu bildirilib.

Xatırladaq ki, 6 yanvar tarixindən Suriyanın Hələb şəhərinin Şeyx Məqsud və Əşrəfiyyə məhəllələri PKK-YPG tərəfindən ələ keçirilib. Lakin Suriya ordusunun onlara qarşı əməliyyatları davam edir.

Hətta Suriya ordusu Hələbdə SDQ terror təşkilatına qarşı keçirilən əməliyyatlardan sonra atəşkəs elan edib. Atəşkəs qərarının əsas məqsədi məhəllələrdə hərbi mövcudluğa son qoymaq, rəsmi əməliyyatların bərpasına şərait yaratmaq və evlərini tərk etmiş mülki şəxslərin geri qayıtmasını asanlaşdırmaq olub.

Hücumlar zamanı 10 mülki şəxs həlak olub, 88 nəfər isə yaralanıb. Bölgədəki toqquşmalara görə 142 min mülki şəxs təhlükəsiz ərazilərə təxliyə edilib.