Rumıniyada kiberdələduzluğa görə məhkum olunmuş və cəzasını Tırqu-Jiu şəhərindəki cəzaçəkmə müəssisəsində çəkən kişi həbsxananın informasiya sistemini sındıraraq 15 məhbusun cəza müddətini azaldıb.

Oxu.Az bu barədə "Din Politică" portalına istinadən xəbər verir.

Şübhəli həbsxana xəstəxanasında yatarkən inzibatçı hüquqları olan əməkdaşın hesab məlumatlarına gizlicə baxıb. Tırqu-Jiuya qayıdandan sonra qoşulmuş klaviaturası olan informasiya avtomatından istifadə edərək bazadakı məlumatları dəyişdirməyə başlayıb.

Beləliklə, haker məhbusların cəza müddətlərini azaldıb və alış-verişlərə xərclənən pulları onların hesablarına qaytarıb. Pozuntular iqtisadi şöbənin işçisi tərəfindən təsadüfən aşkarlanıb. Belə ki, alış-verişlərdən sonra hesablardakı məbləğlər azalmayıb.

Hüquq-mühafizə orqanları təhqiqata başlayıblar.