Milli Məclisin deputatı Aqil Abbas növbəti dəfə təzadlı və cəmiyyətdə qəzəb doğuran bir təkliflə gündəmə gəlib.
Deputat bəyan edir ki, tələbələr iki aylıq yay tətilində "avaralıq etməkdənsə", gedib Qarabağda könüllü olaraq tikinti-quruculuq işlərində çalışsınlar.
Arqument kimi isə Azərbaycanın 3 min şəhid verdiyini xatırladır.
​Hörmətli millət vəkili, bəli, bu vətən uğrunda 3 min qəhrəman oğul canından keçdi. Amma hamımız yaxşı bilirik ki, o şəhidlərin mütləq əksəriyyəti məhz bu xalqın sadə, zəhmətkeş və kasıb təbəqəsinin övladları idi.
Onlar torpaq uğrunda qan tökəndə, can verəndə bir an belə tərəddüd etmədilər. İndi isə növbə yenidən "kasıbın balasına" gəldi?
Niyə bu ölkənin bütün ağır yükü, bütün məhrumiyyətləri və fədakarlıqları yalnız və yalnız kasıb təbəqənin üzərinə yıxılmalıdır?
​Sual olunur: Bu ölkənin dövlət büdcəsindən, tenderlərindən, milyonluq layihələrindən milyardlar qazananların, paytaxtın mərkəzində dəbdəbəli həyat sürənlərin övladları haradadır?
​Tələbələri "avaralıq etməkdə" ittiham etməzdən əvvəl, onların yay tətilində niyə işləmək məcburiyyətində qaldığına baxmaq lazımdır.
Bu gün Azərbaycan tələbəsinin böyük qismi yay aylarında istirahət etmir; onlar növbəti tədris ilinin təhsil haqqını ödəmək, kirayə pulunu çatdırmaq və ailəsinə yük olmamaq üçün tikintilərdə, kafelərdə, kuryer xidmətlərində 12-14 saat qul kimi çalışırlar.
Onların Qarabağa gedib iki ay "könüllü" (yəni pulsuz) işləmək kimi bir lüksü yoxdur!
​Əgər ortada bir fədakarlıq və vətənpərvərlik nümunəsi olmalıdırsa, buyurun, nümunəni yuxarıdan başlayın:
​Məmurların və deputatların övladları: Londonun, Parisin, Dubayın bahalı kurortlarında, yaxtalarında tətil edən məmur uşaqlarını toplayın.
​Xaricdə oxuyan "elita": Yay tətilində bura gəlsinlər, bahalı idman avtomobillərindən düşüb, Qarabağın istisində kərpic kəssinlər, asfalt vursunlar.
​Vətənpərvərlik şüarları deyənlər: Tribunalardan bəlağətli çıxışlar edənlər öz övladlarını o tikintilərə briqadir təyin etsinlər.
​Şəhidlərin müqəddəs qanı üzərindən siyasi manipulyasiya etmək və bunu kasıb tələbənin üzərində bir təzyiq vasitəsinə çevirmək yolverilməzdir.
Qarabağın bərpası üçün dövlət büdcəsindən milyardlarla vəsait ayrılır və o işləri görən şirkətlər böyük pullar qazanırlar.
Şirkətlərin qazandığı layihələrdə tələbələri "könüllü" adı ilə pulsuz işçi qüvvəsi kimi istifadə etmək təklifi ən azı ədalətsizlikdir.
​Cənab deputat, xalq artıq hər şeyi görür və analiz edir. Əgər Qarabağda kimsə iki ay təmənnasız tər tökməlidirlərsə, qoy o siyahının başında sizin və həmkarınız olan məmurların, oliqarxların övladları dursun.
Kasıbın balası canı ilə bu vətəni qorudu, imkan verin, heç olmasa təhsilini davam etdirmək üçün iki qəpik çörək pulu qazansın. Vətəni sevmək növbəsi bir az da varlıların, harınlamış məmur övladlarınındır!
Sima Babayeva
TEREF