İtaliyada 57 yaşlı kişinin səhvən içində qızıl külçələr olan qutunu zibil konteynerinə atması ilə bağlı maraqlı hadisə baş verib.

Bu barədə RMF24 radiostansiyasına istinadən məlumat yayıb.

Hadisə Leççe vilayətinin Torre-Lapillo yaşayış məntəqəsində qeydə alınıb. Yerli sakin təsadüfən içində 20 ədəd qızıl külçə olan metal qabı tullantı konteynerinə atıb.

Məlumata görə, kişi uzun illər ərzində qiymətli metala investisiya edərək təxminən 120 min avro (təxminən 242 min manat) dəyərində kapital toplayıb. Qızılların itdiyini yalnız bir gün sonra anlayan şəxs dərhal hüquq-mühafizə orqanlarına müraciət edib.

Polis araşdırma zamanı konteynerlərin artıq Ucento poliqonuna daşındığını müəyyən edib. Orada təşkil olunan axtarış əməliyyatı uğurla başa çatıb və qızıl külçələr olan qab tapılaraq sahibinə qaytarılıb.