Həkim-kardioloq, tibb elmləri namizədi Zuhra Salpaqarova enerji içkiləri ilə kofenin birlikdə qəbulunun orqanizm üçün ciddi risklər yaratdığı barədə xəbərdarlıq edib. Mütəxəssisin sözlərinə görə, bu iki içkinin eyni vaxtda istifadəsi təhlükəsiz kofein dozasının aşılmasına gətirib çıxarır və ürək-damar, eləcə də sinir sisteminə həddindən artıq yük salır.

32gun.az yazır ki, bir qutu enerji içkisində təxminən 80–160 mq, bir fincan kofedə isə 80–120 mq kofein var. Onları birlikdə qəbul etdikdə sağlam böyüklər üçün müəyyən edilmiş birdəfəlik 200 mq və günlük 400 mq təhlükəsiz norma asanlıqla pozulur. Yüksək doza orqanizmdə adrenalin ifrazını sürətləndirərək nəbzin artmasına, təzyiqin yüksəlməsinə və ürəyin oksigenə olan tələbatının kəskin pişikməsinə səbəb olur.

Bu cür təhlükəli kombinasiya tez-tez ürəkdöyünmə, həyəcan, yuxusuzluq, əllərdə əsmə və baş ağrıları ilə nəticələnir. Kardioloq xüsusilə vurğulayır ki, gipertoniyadan, ritm pozuntularından və ürək xəstəliklərindən əziyyət çəkənlər, həmçinin yeniyetmələr və hamilə qadınlar üçün bu qarışıq həyati təhlükə daşıyır.

Bundan əlavə, enerji içkilərinin tərkibindəki quarana, taurin və digər stimullaşdırıcı maddələr kofeinlə birləşdikdə orqanizmə kompleks mənfi təsir göstərir. Həkim diqqəti toplamaq üçün yalnız bir fincan kofe ilə kifayətlənməyi, xroniki yorğunluq zamanı isə stimulyatorlara üstünlük vermək əvəzinə, daha təhlükəsiz bərpa üsullarından istifadə etməyi məsləhət görür.