ABŞ ilə İran arasında münaqişənin genişlənməsi qlobal iqtisadi artımı kəskin zəiflədə, inflyasiyanı artıraraq faiz dərəcələrinin yüksəlməsinə səbəb ola bilər.

Bunu Dünya Bankının baş iqtisadçısı İndermit Gill bildirib.

Onun sözlərinə görə, Dünya Bankının ən mənfi ssenarisinə əsasən, müharibə altı ay və ya daha uzun davam edərsə, 2026-cı ildə qlobal iqtisadi artım 1,3%-ə enə bilər. Müqayisə üçün, ötən il bu göstərici 2,9% olub. Eyni zamanda, qlobal inflyasiyanın 4,5%-ə yüksələcəyi proqnozlaşdırılır.

Gill qeyd edib ki, uzunmüddətli qarşıdurma neft tədarükü ilə yanaşı, kənd təsərrüfatı üçün vacib olan gübrə və digər məhsulların daşınmasını da poza bilər ki, bu da ərzaq təhlükəsizliyinə mənfi təsir göstərəcək.

Onun sözlərinə görə, xüsusilə yüksək borclu və pandemiyadan tam bərpa olunmayan ölkələr daha böyük risk altındadır. Artan faiz dərəcələri onların borclanma xərclərini yüksəldərək təhsil, səhiyyə və digər vacib sahələrə ayrılan vəsaiti azalda bilər.

Dünya Bankının məlumatına görə, hazırda aşağı və orta gəlirli ölkələrin 40%-i (32 ölkə) artıq borc böhranı yaşayır və ya yüksək risk altındadır. Gill bəzi ölkələr üçün borcların fərdi qaydada silinməsinin zəruri ola biləcəyini də istisna etməyib.